რომის პაპმა ფრანცისკემ პოლიციის ოფიცრის მხრიდან ჯორჯ ფლოიდის მკვლელობას ტრაგიკული უწოდა. მისივე თქმით, ის ლოცულობს ყველა იმ ადამიანისთვის, ვინც "რასიზმის ცოდვის მსხვერპლი გახდა".

"ჩემო მეგობრებო, ჩვენ ვერ დავხუჭავთ თვალებს და ვერ ვიქნებით ტოლერანტულები რასიზმის ნებისმიერი ფორმის მიმართ და ამავე დროს ვაცხადებდეთ, რომ თითოეული ადამიანის სიცოცხლის სიწმინდეს ვიცავთ. მაგრამ, ამავე დროს, უნდა ვაღიაროთ, რომ ბოლო ღამეების ძალადობა თვითგამანადგურებელია. ძალადობას არაფერი მოაქვს და ბევრი რამ იკარგება", — განაცხადა რომის პაპმა.

აშშ-ში უკვე რამდენიმე დღეა აფროამერიკელი ჯორჯ ფლოიდის სიკვდილს აპროტესტებენ, რომელიც დაკავების დროს პოლიციელის გულგრილობისა და არაადამიანური ქმედებების გამო დაიღუპა. მიუხედავად იმისა, რომ ათეულობით ქალაქში კომენდანტის საათი გამოაცხადეს, დემონსტრანტები შეზღუდვას არ ითვალისწინებენ.

მოქალაქეები სისტემაში არსებული რასიზმის წინააღმდეგ გაერთიანდნენ. გამონათქვამებისა და ტვიტების გამო რასიზმში ადანაშაულებენ აშშ-ს პრეზიდენტ დონალდ ტრამპსაც.

მშვიდობიანად დაწყებული პროტესტი არეულობასა და დარბევაში გადაიზარდა. დემონსტრანტები ცეცხლს უკიდებენ მანქანებს და არბევენ მაღაზიებს, პოლიცია კი ცრემლსადენ გაზსა და რეზინის ტყვიებს იყენებს.

ამავე თემაზე: