დამოუკიდებელი დეპუტატის, დავით ჭიჭინაძის განცხადებით, ის თბილისში, ისანში აპირებს მაჟორიტარად კენჭისყრას. ჭიჭინაძე დარწმუნებულია, რომ გაიმარჯვებს და სხვები "უშანსოდ არიან".

"არ ვიცი, მე ვიფქრობ, რომ სხვები იქნებიან აბსოლუტურად უშანსოდ ამ რაიონში. მაგის გარანტიას ყველას ვაძლევ. შეუძლიათ ერთად გაერთიანდნენ და ერთი კანდიდატი დამიყენონ, ოცნებასთან ერთად", — განუცხადა მან მთავარ არხს.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.