აშშ-ს პრეზიდენტი დონალდ ტრამპი აცხადებს, რომ დემონსტრანტების დასაშლელად არმიის გამოყენება შეუძლია. მისივე თქმით, ის მზადაა ათასობით ჯარისკაცი გაგზავნოს. არეულობასა და ძალადობის აქტებს ტრამპმა შიდა ტერორი უწოდა.

"სამოქალაქო და სამხედრო, და ყველა რესურსის მობილიზებას მოვახდენ, რათა არეულობა და მაროდიორობა დასრულდეს", — განაცხადა ტრამპმა ორშაბათის ბრიფინგის დროს.

1878 წლის კანონის, Comitatus Act-ის თანახმად, კონგრესის თანხმობის გარეშე ქვეყნის შიგნით სამხედრო ძალები ვერ იმოქმედებენ. თუმცა ტრამპი აცხადებს, რომ ის გამოიყენებს 1807 წელს მიღებულ კანონს, Insurrection Act-ს, რომელიც მას შემდეგ აშშ-ში არასდროს გამოუყენებიათ.

დონალდ ტრამპის გამოსვლამდე რამდენიმე წუთით ადრე თეთრ სახლთან დემონსტრანტების დასაშლელად პოლიციამ და სამხედროებმა ცრემლსადენი გაზი გამოიყენეს.

ბოლო დღეების განმავლობაში აშშ-ის ქალაქებში არაერთი მაღაზია და მანქანა დაიწვა. დემონსტრანტები კერძო საკუთრებებს არბევენ. ამის საპასუხოდ 40-მდე ქალაქში კომენდანტის საათი დააწესეს, თუმცა დემონსტრანტები მას არ იცავენ.

მასობრივი არეულობა მას შემდეგ დაიწყო, რაც წინა კვირას მინეაპოლისში დაკავების დროს პოლიციელმა აფროამერიკელი, ჯორჯ ფლოიდი მოკლა. ინტერნეტში გავრცელდა დაკავების ვიდეოც, სადაც ჩანს, რომ ხელებშეკრული ჯორჯ ფლოიდი ასფალტზე წევს, ხოლო პოლიციელი დერეკ შოვინი მას კისერზე მუხლს აჭერს. ვიდეო ერთ-ერთმა გამვლელმა გადაიღო.

"ვერ ვსუნთქავ", "არ მომკლათ" — ამ სიტყვებს იძახდა ფლოიდი, როცა პოლიციელი მას კისერზე მუხლს აჭერდა. ამასთან, ვიდეოში ჩანს მეორე პოლიციელიც, რომელიც ფლოიდს არ ეხმარება და არც აღშფოთებულ გამვლელებს აძლევს ახლოს მისვლის უფლებას.

აღნიშნული შემთხვევიდან მალევე დერეკ შოვინი და კიდევ სამი პოლიციელი სამსახურიდან გაათავისუფლეს. რამდენიმე დღეში კი შოვინი ფლოიდის მკვლელობის ბრალდებით დააკავეს.