საგარეო საქმეთა სამინისტრო 21 მაისს, გორის რაიონის სოფელ მერეთში რუსეთის საოკუპაციო ძალების მიერ უკანონო ბორდერიზაციის პროცესის განახლებას გმობს. ამ თემაზე კომენტარი უწყებამ დღეს გაავრცელა.

"საგარეო საქმეთა სამინისტრო კატეგორიულად გმობს 21 მაისს რუსეთის საოკუპაციო ძალების მიერ საქართველოს მთავრობის მიერ კონტროლირებულ სოფელ მერეთში, გორის მუნიციპალიტეტი, ე.წ. ბორდერიზაციის უკანონო პროცესის დაწყებასა და ბოლო ორი თვის განმავლობაში რუსეთის ფედერაციის გახშირებული პროვოკაციებს", — ნათქვამია გაცხადებაში.

მთავარ არხთან საუბრისას ადგილობრივი ყვება, რომ სამოქალაქო ფორმაში ჩაცმულმა პირებმა მავთულხლართების გასავლებად ტერიტორიის დასუფთავება დაიწყეს.

აღნიშნულ თემაზე საგარეო საქმეთა სამინისტრო საერთაშორისო თანამეგობრობას მიმართავს, რათა მათ სათანადო შეფასება მისცენ რუსეთის დესტრუქციულ ნაბიჯებს და ქმედითი ზომები მიიღოს საქართველოს წინააღმდეგ რუსეთის გახშირებული თავდასხმების შესაჩერებლად.