გერმანული ავიაკომპანია Lufthansa-ს პილოტები კიდევ გაიფიცნენ. ამჯერად გაფიცვა ორდღიანია. შედეგად შეწყვეტილია ავიაკომპანიის 876 ადგილობრივი და საერთაშორისო რეისი, მათ შორის, 24 ნოემბერს არ შესრულდება მიუნხენი-თბილისის, თბილისი-მიუნხენისა და მიუნხენი-ვაშინგტონის რეისები. საქართველოდან მიმავალი მგზავრები აშშ-ში სწორედ ამ მარშრუტით მიფრინავენ, თუ ლუფთანზას სერვისით სარგებლობენ.

თბილისი-მიუნხენისა და მიუნხენი-ვაშინგტონის 24 ნოემბრის შეწყვეტილი რეისი.

ფოტო: Flightradar24.com

საერთო ჯამში, 2016 წელს ეს ამ ავიაკომპანიის პილოტების მე-14 გაფიცვაა. როგორც საერთაშორისო მედიასაშუალებები წერენ, გერმანულ აეროპორტებში ამ დროისათვის ქაოსია, რადგან პილოტების გაფიცვა 100 ათას მგზავრს შეეხო.

გერმანელ პილოტთა პროფკავშირი ლუფთანზასგან 5 ათასზე მეტი პილოტისთვის ხელფასების 3,7 პროცენტით ზრდას ითხოვს 2017 წლამდე, ავიაკომპანია კი მხოლოდ 2,5 პროცენტით ზრდას ჰპირდება, ისიც 2019 წლამდე პერიოდში, რაც პილოტებისთვის მიუღებელია.