აშშ-ში ტეხასის შტატში, დალასში სალონის მეპატრონე, შელი ლუთერი კორონავირუსის შეზღუდვების მიუხედავად სილამაზის სალონის გახსნის გამო ერთი კვირით დააპატიმრეს. იგი, მანამდე, ბიზნესის გახსნის მოთხოვნით გამათულ საპროტესტო მსვლელობაში იღებდა მონაწილეობას. ლუთერის სასამართლო სხდომა 6 მაისს გაიმართა. პოლიციის ინსპექტორმა სასამართლოს განუცხადა, რომ საკუთარი თვალით ნახა, როგორ შედიოდა სალონში ხალხი და თმას იჭრიდა.

BBC-ის ცნობით, მოსამართლემ ქალს განუცხადა, რომ პატიმრობას არ შეუფარდებდა, თუკი ბოდიშს მოიხდიდა იმისთვის, რომ "ეგოიზმი" გამოიჩინა, ასევე, დახურავდა სალონს და გადაიხდიდა დაკისრებულ ჯარიმას. სალონის მეპატრონემ, შელი ლუთერმა სხდომაზე თქვა, რომ შვილების გამოკვება ეგოიზმი არაა:

"ვერ დაგეთანხმებით, როდესაც ამბობთ, რომ ეგოისტი ვარ, რადგან ჩემი შვილების გამოკვება არაა ეგოიზმი. მე მყავს სტილისტები დასაქმებული ჩემს სალონში, რომლებიც, ასევე, შიმშილობენ, რადგან მათაც ჰყავთ შვილები. თუკი ფიქრობთ, რომ კანონი უფრო მნიშვნელოვანია, ვიდრე ბავშვების გამოკვება, მაშინ მიდით, დაასრულეთ თქვენი გადაწყვეტილება. მე არ ვაპირებ სალონის დაკეტვას".

შელი ლუთერი პატიმრობასთან ერთად 7 ათასი დოლარით დააჯარიმეს და გააფრთხილეს, რომ კიდევ დღიურად 500 დოლარითაც დაჯარიმდებოდა, თუკი ბიზნესს გახსნიდა.