თბილისის მერი, კახა კალაძე, ყოფილი პრეზიდენტის, მიხეილ სააკაშვილის უკრაინის ვიცე-პრემიერად შესაძლო დანიშვნას ეხმაურება და ამბობს, რომ "ეს კინო უკვე ნანახი აქვთ".

მისი თქმით, ყველას ახსოვს უკრაინის ყოფილი პრეზიდენტის მიერ სააკაშვილის ოდესის გუბერნატორად დანიშვნა როგორც დასრულდა.

"რა თქმა უნდა, ეს უკრაინის ხელისუფლების გადასაწყვეტია. თუმცა, კიდევ ერთხელ ვიმეორებ, ჩვენ და უკრაინა ვართ სტრატეგიული პარტნიორები და მარტივად რომ ვთქვა, მინიმუმ უხერხულობას ქმნის ის, რომ ჩვენს ქვეყანაში სამივე ინსტანციის მხრიდან გასამართლებულ ადამიანს აძლევ კონკრეტულ თანამდებობას. რა თქმა უნდა ამას ჩვენი მხრიდან შესაბამისი რეაგირება ექნება", — განაცხადა კალაძემ იმედის ეთერში.

სააკაშვილის ვიცე-პრემიერად დანიშვნის საკითხი, შესაძლოა, საქართველოსა და უკრაინას შორის დიპლომატიური ურთიერთობის შეწყვეტის მიზეზი გახდეს. ქართული ოცნების წარმომადგენლები ზელენსკის გადაწყვეტილებას კატეგორიულად მიუღებელს უწოდებენ.

პეტრო პოროშენკოს დროს მიხეილ სააკაშვილი ოდესის გუბერნატორის პოსტს იკავებდა. თუმცა, მას შემდეგ, რაც სააკაშვილმა კორუფციაზე საუბარი დაიწყო, თანამდებობა დატოვა და ოპოზიციაში გადავიდა, პოროშენკოს განკარგულებით მოქალაქეობა ჩამოართვეს და მის წინააღმდეგ სისხლისსამართლებრივი დევნა დაიწყეს. პოროშენკოს ბრძანებით ის რეადმისიით პოლონეთში დააბრუნეს.

საპრეზიდენტო არჩევნებში გამარჯვების შემდეგ ვოლოდიმირ ზელენსკიმ სააკაშვილს მოქალაქეობა დაუბრუნა, რის შემდეგ ოდესის ყოფილი გუბერნატორი ქვეყანაში დაბრუნდა. რამდენიმე დღის წინ კი ცნობილი გახდა, რომ ზელენსკიმ მას ვიცე-პრემიერის პოსტი შესთავაზა.

ამავე თემაზე: