დაავადებათა კონტროლის ცენტრის ხელმძღვანელი, ამირან გამყრელიძე ამბობს, რომ კრიტიკულად მნიშვნელოვანი ექიმების დაავადება ჯანდაცვის სისტემისთვის დიდი დარტყმა იქნება, რადგან ისინი 3-4 კვირის განმავლობაში ვეღარ მუშაობენ. როგორც მან რუსთავი 2-ის ეთერში თქვა, ამ ეტაპისთვის საქართველოში 16 ექიმია კორონავირუსით ინფიცირებული.

"ინტენსიური თერაპიის, რეანიმაციის ექიმები, ისინი თუ ჩვენ ჩაგვიწვნენ, ბოდიში ამ სიტყვისთვის, მერე ამ ხალხს ვინ უნდა მოუაროს, გამაგებინეთ? რაც ნაკლები გადამდები და ინფექციის გამავრცელებელი იქნება ქვეყანაში, ჯანდაცვის სისტემა იქნება უფრო ძლიერი და უფრო ადვილად მოუვლის იმ საშუალო სიმძიმის პნევმონიას და მსუბუქ შემთხვევებს", — აღნიშნა გამყრელიძემ.

გამყრელიძე მოუწოდებს მოსახლეობას, რომ მომავალი კვირების განმავლობაში სახლში დარჩეს, არც ეკლესიაში წავიდეს და არც სასაფლაოზე გავიდეს. მისივე თქმით, თუ შემთხვევები რაოდენობა 5, 8 ან 10 ათასი იქნება, ჯანდაცვის სისტემა მათ ვერ მოუვლის.

რამდენიმე დღის წინ ჯანდაცვის მინისტრმა, ეკატერინე ტიკარაძემ განაცხადა, რომ ქვეყანაში საქართველოში 488 რეანიმატოლოგია, ადამიანური რესურსის ფარგლებში კი მათ დღეში 1 200 პაციენტის მოვლა შეუძლიათ. ამასთან, ქვეყანაში არის სულ 256 ინფექციონისტი და ოპტიმალური გადანაწილების პირობებში, მათ 853 პაციენტის მოვლა შეუძლიათ.

გუშინ, 15 აპრილს საქართველოს მთავრობამ და საპატრიარქომ გადაწყვიტა, რომ საგანგებო მდგომარეობისა და კომენდანტის საათის მიუხედავად, აღდგომის ლიტურგიას მრევლი დაესწრება.

ამის შესახებ ინფორმაცია საპატრიარქოს პრესსპიკერმა, ანდრია ჯაღმაიძემ და პრემიერ-მინისტრის პრესსპიკერმა, ირაკლი ჩიქოვანმა თანმიმდევრულად გააჟღერეს. ანდრია ჯაღმაიძის თქმით, დიდ ეკლესიებში ორი მეტრის დისტანცია იქნება დაცული, პატარა ტაძრებში კი მრევლი ეზოში განაწილდება. მისი განმარტებით, მრევლი ეკლესიაში კომენდანტის საათის დაწყებამდე მივა და დილის 6 საათზე წამოვა. პრემიერ-მინისტრის პრესსპიკერის, ირაკლი ჩიქოვანის განცხადებით, ეკლესიებთან მობილიზებული იქნება პოლიცია.

ეკლესია ასაკობრივი ჯგუფის, რისკჯგუფის, დაავდების ან რაიმე სიმპტომის მქონე ადამიანებს, ასევე, ბავშვებს აძლევს რეკომენდაციას, ჯანდაცვის სამინისტროსა და დაავადებათა კონტროლის ეროვნული ცენტრის ყველა რეკომენდაცია გაითვალისწინონ. ჯაღმაიძემ, ასევე, თქვა, რომ აღდგომის დღეებში სასაფლაოზე არ წასვლით, არაფერი დაირღვევა და ეს ეკლესიის წესების ნაწილი არაა.

დაავადებათა კონტროლის ეროვნული ცენტრის დირექტორის მოადგილემ. პაატა იმნაძემ კი თქვა, რომ ინფიცირებულებმა, რომლებმაც არ იციან დაავადების არსებობის შესახებ, ეკლესიებში მივლენ და ავად გახდიან ყველას. მისი თქმით, თუ არ გვინდა საქართველო კუბოების რაოდენობას ვეღარ აუდიოდეს, ყველა სახლში უნდა დარჩეს.

16 აპრილს ცნობილი გახდა, რომ საქართველოში კორონავირუსით კიდევ 30 ადამიანი დაინფიცირდა და მათი რაოდენობა ჯამში 336 გახდა. ბოლო მონაცემებით, საქართველოში კორონავირუსისგან გამოჯანმრთელებულია 74 პაციენტი, ხოლო გარდაცვლილია 3 ადამიანი, უცხოეთიდან სამკურნალოდ გადმოყვანილი საქართველოს მოქალაქეები — 3, კარანტინის რეჟიმში 5 000 პირი რჩება, სტაციონარში მეთვალყურეობის ქვეშ კი 494 პაციენტი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: