პირველი საუნივერსიტეტო კლინიკის დირექტორი აცხადებს, რომ თუკი მოსახლეობა ფიზიკურ დისტანციას არ დაიცავს, "დადგება დრო, რომ ექიმი აღარ იქნება". ლევან რატიანი ისევ რესურსის ამოწურვის საფრთხეზე მიუთითებს:

"ბატონ პაატას [იმნაძეს] დიდ პატივს ვცემ, ნამდვილად ასე იქნება, დადგება მომენტი, რომ ექიმი ქვეყანას არ ეყოლება. ჩვენც ადამიანები ვართ, ჩვენც გვაქვს რესურსი და შესაძლებლობა".

ლევან რატიანმა მოსახლეობა გააფრთხილა, რომ თუ ასე გაგრძელდება "ღლიცინი", რასაც მისივე თქმით, ქვეყნის მოსახელობის უმეტესობა აკეთებს, ვერ აუვლენ ამდენს ქართველი ექიმები და არ ეყოფათ.

დღესვე, 16 აპრილს ბოჭორიშვილის კლინიკის სამეთვალყურეო საბჭოს თავმჯდომარემ, მაკა სოლოღაშვილმა მოსახლეობა გააფრთხილა, რომ თუკი რეკომენდაციებს არ დაიცავენ და სახლში არ დარჩებიან, ადამიანური რესურსი და მარაგები აღარ ეყოფათ. მან ჟურნალისტებთან განმარტა, რომთუ ამ ტემპით წავიდა ზრდა ეს აღჭურვილობა, ალბათ, 10 დღის განმავლობაში ეყოფა, თუ ზრდის ტემპით წავიდა, "არაპროგნოზირებადია".

16 აპრილს ცნობილი გახდა, რომ საქართველოში კორონავირუსით კიდევ 30 ადამიანი დაინფიცირდა და მათი რაოდენობა ჯამში 336 გახდა. ბოლო მონაცემებით, საქართველოში კორონავირუსისგან გამოჯანმრთელებულია 74 პაციენტი, ხოლო გარდაცვლილია 3 ადამიანი, უცხოეთიდან სამკურნალოდ გადმოყვანილი საქართველოს მოქალაქეები — 3, კარანტინის რეჟიმში 5 000 პირი რჩება, სტაციონარში მეთვალყურეობის ქვეშ კი 494 პაციენტი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: