დანიაში 11 წლამდე ბავშვები სკოლებსა და ბაგა-ბაღებს უბრუნდებიან. ქვეყნის მთავრობა ევროპაში პირველია, რომელმაც საგანმანათლებლო დაწესებულებებში კორონავირუსის გავრცელების პრევენციასთან დაკავშირებული შეზღუდვების შემსუბუქება დაიწყო.

პრემიერ-მინისტრი, მეტე ფრედერიკსენი პირადად მიესალმა კოპენჰაგენის ერთ-ერთ სკოლაში დაბრუნებულ მოსწავლეებს.

თუმცა ველბიუს რაიონის სკოლაში სტუმრობისას ფრედერიკსენმა ისიც თქვა, რომ მისთვის სრულიად გასაგებია, რატომ ამჯობინებს ზოგიერთი მშობელი, თავისი შვილები სახლში დატოვოს.

ზოგიერთი პოლიტიკოსის განცხადებით კი, გაუგებარია, რა სისტემით გადაწყდა, ვინ დაბრუნდება სკოლაში. ამასთან, თავად სკოლები გადაწყვეტენ, დაბრუნდნენ თუ არა სამსახურში თანამშრომლები, რომლებიც რისკ-ჯგუფში შედიან.

დანია ევროპის ერთ-ერთი პირველი ქვეყანა იყო, რომელმაც სავალდებულო კარანტინის ზომები მიიღო და სკოლებში სასწავლო პროცესი 12 მარტს შეაჩერა.

მიუხედავად იმისა, რომ დაავადების გამოვლენის შემთხვევები ქვეყნის შიგნით ბევრი არაა, ექსპერტების თქმით, საკარანტინო ზომების შემსუბუქების სტრატეგია მაინც სარისკოა.

"ჩვენ ყველანი ცოტათი ვნერვიულობთ და მომავალშიც მკაცრად უნდა დავიცვათ ჰიგიენის წესები", — განაცხადა ელისა რიმპლერმა, BUPL-ის, დანიის ბავშვთა და ახალგაზრდობის საგანმანათლებლო კავშირის წარმომადგენელმა, — "დღის განმავლობაში ხშირად უნდა ვიბანოთ ხელები. მიუხედავად იმისა, რომ ნიღბებს არ ვატარებთ, ფიზიკური დისტანციის დაცვაც უნდა გავაგრძელოთ, რაც რთული ამოცანაა".

დანიის ამ გადაწყვეტილებას დაემთხვა ევროკომისიის პრეზიდენტის, ურსულა ფონ დერ ლაიენის მიერ გეგმის წარდგენა 27 წევრი ქვეყნის ტერიტორიაზე შეზღუდვების ნელ-ნელა შემსუბუქების თაობაზე. თუმცა მან იქვე განმარტა, რომ ეს გადაწყვეტილება დაუყოვნებლივი მოქმედების სიგნალი არ გახლდათ.

ფონ დერ ლაიენის გეგმით განისაზღვრა სავალდებულო პირობები COVID-19-ის გავრცელების პრევენციისთვის. მათ შორისაა ჯანდაცვის სისტემების გადატვირთვისგან დაზღვევა, მონიტორინგი და დაკვირვება. ამასთანავე, როგორც ევროკომისიის პრეზიდენტმა დასძინა, გაიმართება დონორების ონლაინკონფერენცია მთავრობებისა და ორგანიზაციებისათვის, რათა ვაქცინის ძიების პროცესის ფინანსურად უზრუნველყოფა მოხდეს.

ამ კვირაში დანიის გარდა სხვა ქვეყნებშიც დაიწყო დაწესებული შეზღუდვების შემსუბუქება:

• ავსტრიაში ათასობით პატარა მაღაზიის კარი სამშაბათს ისევ გაიღო;
• ჩეხეთის რესპუბლიკის მთავრობამ დაწესებულებათა ნაწილის გაღების ხუთეტაპიანი განრიგი შეიმუშავა;
• ესპანეთში ორკვირიანი პაუზის შემდეგ სამსახურში დაბრუნების უფლება მისცეს არასასიცოცხლო მნიშვნელობის სფეროებში მომუშავეებს;
• იტალიის ზოგიერთ რეგიონში მოზარდებისთვის განკუთვნილი წიგნისა და ტანსაცმლის მაღაზიები ისევ გაიხსნა.

რა მოიმოქმედა დანიამ?

დანიაში ამ დროისათვის 299 გარდაცვალების და დაინფიცირების 6 681 შემთხვევაა დაფიქსირებული. თუმცა ვარაუდობენ, რომ ეს უკანასკნელი მონაცემი რეალურად უფრო მაღალია.

საერთაშორისო ქება დაიმსახურა მთავრობის სწრაფმა მოქმედებამ — მათ COVID-19-ის ფართოდ გავრცელებამდე მიიღეს შეზღუდვები. ამის გამო ქვეყანას სამხრეთ კორეასაც ადარებენ.

ინფექციური დაავადებების ინსტიტუტის, SSI-ის ხელმძღვანელმა, ტიურა ტროვე კრაუზემ, განაცხადა, რომ დანიამ 12 მარტს გამოცხადებული კარანტინით მოახერხა, შეემცირებინა იმ ადამიანების რიცხვი, რომლებიც შიდა გავრცელებით დაინფიცირდებოდა: თუკი, ჩვეულებრივ, ერთი დაავადებული 2,6 სხვა ადამიანს აინფიცირებს, დანიაში ეს რიცხვი 0,6-ს უტოლდება.

კრაუზესვე თქმით, ეს წარმატება იმის დამამტკიცებელი საბუთია, რომ ფიზიკურ დისტანცირებას, ჰიგიენის დაცვას და სხვა ისეთ ზომებს, როგორიც, მაგალითად, სახლიდან მუშაობაა, ნამდვილად მოაქვს შედეგი.

ქვეყნის პრემიერ-მინისტრის განცხადებით კი, წინსვლა იმდენად დიდი და თვალშისაცემია, რომ ახლა იგი თავის პოლიტიკურ პარტნიორებთან სხვა შეზღუდვების ეტაპობრივად მოხსნის გზებს განიხილავს.