საქართველოს ყოფილმა პრეზიდენტმა მიხეილ სააკაშვილმა გადაცემა არჩევანში, გიორგი გაბუნიასთან ვრცელ ინტერვიუში, ნაციონალური მოძრაობის დამარცხებაზე და ოდესის ოლქის გუბერნატორობიდან გადადგომაზე ისაუბრა. ინტერვიუში რომელიც, დღეს, 15 ნოემბერს ტელეკომპანია რუსთავი 2-ის ეთერში, 22 საათზე გავა, სააკაშვილი აცხადებს, რომ მისი გუბერნატორად დარჩენა სირაქლემის პოზიციის ტოლფასი იქნებოდა:

"ჩემთვის დარჩენა სამთავრობო სტრუქტურაში, თანაც უკრაინის ერთ-ერთი ყველაზე დიდი ოლქის გუბერნატორად, ეს იქნებოდა სირაქლემის პოზიციაში ჩადგომა, ვითომ არაფერი არ ხდება".

იგი ასევე საუბრობს თავის ახალ ოპოზიციურ პარტიაზე:

"ახალი პარტია ჩემთვის ეს არის მეორე სუნთქვა, მეორე ახალგაზრდობა, საინტერესოა როცა თამაშის წესები იცი, თან შეგიძლია ახალი სვლები გააკეთო, ახალი ექსპერიმენტი ჩაატარო".

სააკაშვილმა ასევე საქართველოს საპარლამენტო არჩევნებზეც გაამახვილა ყურადღება, აღნიშნა, რომ იგი გააყალბეს. მისივე თქმით, პარტიის შიგნით გადაწყვეტილებას თავად არ იღებს რადგან ეს მისი ფუნქცია არ არის. მიხეილ სააკაშვილმა ყოფილი პირველი ლედის პარლამენტში შესვლაზე უარის თქმის შესახებ განაცხადა, რომ ეს მხოლოდ სანდრას გადაწყვეტილება იყო და თავად არ ჩარეულა:

"ეს[საპარლამენტო არჩევნები] იყო ყველაზე დიდი აფიორა, რაც ოდესმე ჩატარებულა საქართველოში. მე არ ვაწერ ხელს დამარცხებას. ვის ვატყუებთ, თავს ვიტყუებთ ხო? დედის რძესავით შეირგეთ გაყალბება. ხალხი დაიცავს თავის თავს, თუ ლიდერები მზად არიან, რომ იბრძოლონ მათთვის".

მიხეილ სააკაშვილის თქმით, ნაციონალურ მოძრაობაში ბევრი წევრი დაიღალა და ბიძინა ივანიშვილმა ყველაფერი გააკეთა პარტიის დასაშლელად:

"ყველაფერი გააკეთა რომ ნაციონალური მოძრაობა დაეშალა. რა თქმა უნდა ახლაც შეეცდება".