ახალი საქართველოს ლიდერი, გიორგი ვაშაძე ამბობს, რომ სახელმწიფომ თვეზე მეტი დაკარგა და კიდევ უფრო მეტ დროს კარგავს. მისი თქმით, დანაშაულია, რომ დღეს ქვეყანაში კორონავირუსზე მასობრივი ტესტირება არ ხდება.

"გინდა სწრაფი იყოს, გინდა ნელი, ოქროსი იყოს, ვერცხლის, ბრინჯაოს, როგორი ტესტიც გინდათ, მაგრამ ადამიანების დიაგნოსტირება დაიწყეთ. თუ ამას არ დავიწყებთ ჩვენ გვემუქრება კიდევ უფრო მეტი შიმშილი და გაჩერებული ეკონომიკა. მე არ მინდა ვივარაუდო, რომ ამას აქვს მიზანმიმართული ხასიათი და სპეციალურად აკეთებენ ამ ყველაფერს", — თქვა გიორგი ვაშაძემ.

ვაშაძის აზრით, სახელმწიფო რომ იმ გეგმას, მიჰყოლოდა, რომელიც ორი კვირის წინ გაუგზავნეს დღეს უკვე თარიღები გვეცოდინებოდა, როდის ავამუშავებდით ეკონომიკას. მისი თქმით, ის რასაც სახელმწიფო დახმარების სახით აკეთებს არასაკმარისია.

ჯანდაცვის სამინისტრომ და ექსპერტებმა ტესტირების ალგორითმი შეიმუშავეს, რომელიც 4 ჯგუფის ტესტირებას ითვალისწინებს. ტესტირება ჩაუტარდებათ: მაღალი რისკის ჯგუფში შემავალ პირებს სპეციფიური სიმპტომებით, უსიმპტომო პირებს მაღალი რისკის ჯგუფებიდან სტრატეგიულ ობიექტებში (მედპერსონალი), ჰოსპიტალიზებულ და ამბულატორიულ პაციენტებს და ორგანიზებულ ჯგუფებს.

სწორედ ორგანიზებულ ჯგუფებში პროტოკოლში გაწერილი არიან:

  • საეკლესიო პირები, მონასტრები და სხვა;
  • პენიტენციურ დაწესებულებებში მყოფი პირები;
  • ხანდაზმულთა სადღეღამისო სპეციალიზებული დაწესებულებებში მყოფები;
    თავდაცვის ძალები;
  • სტაციონარული ფსიქიატრიული დაწესებულებებში მყოფები.

პროტოკოლის მიხედვით, ამ ჯგუფში მყოფ უსიმპტომო პირებს უტარდებათ სკრინინგი ანტისხეულებზე სწრაფი ტესტით, პარალელურად შესაძლებელია ანტიგენის სწრაფი ტესტის ჩატარებაც. თუ ორგანიზებულ ჯგუფებთან მყოფ პირებს დაუდგინდება ინფექცია, ისინი განიხილებიან, როგორც სავარაუდო კონტაქტები და მიეცემათ თვითიზოლაციის ინსტრუქტაჟი. თუ ტესტის შედეგი ანტისხეულებზე დადებითია, იღებენ დამატებით ცხვირ-ხახის ნაცხს ანტიგენისა და PCR კვლევისთვის. უარყოფითი პასუხისას კი განმეორებითი ტესტირება სიმპტომების გაჩენის შემთხვევაში ტარდება.

ჯანდაცვის სფერო და სამთავრობო გუნდის წარმომადგენლები ამბობენ, რომ ვირუსის პიკს სწორედ აპრილის ბოლოს და მაისის დასაწყისში ველოდებით, რაც რელიგიურ დღესასწაულებს ემთხვევა.

ბოლო მონაცემებით, საქართველოში კორონავირუსის 218 დადასტურებული შემთხვევაა, მათგან 50 გამოჯანმრთელებულია, 3 კი გარდაცვლილი. კარანტინის რეჟიმში 4 722 ადამიანია, სტაციონარში მეთვალყურეობის ქვეშ - 408.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: