გვიან ღამით, თსუ-ში დაპირისპირება მოხდა. არსებული ინფორმაციით, უნივერსიტეტში მყოფ სტუდენტებს დაცვის თანამშრომლები და ერთი უცნობი პირი დაუპირისპირდა.

"ძალიან ბევრ რაღაცას გვაბრალებენ, ცოტა ხნის წინ ამოსული იყო დაცვის თანამშრომელი და გვითხრა, რომ ნასვამები ვართ. ვიმეორებთ, აქ არანაირი ალკოჰოლური სასმელი არ გვაქვს. პირიქით, დაცვის თანამშრომელს ასდიოდა ალკოჰოლის სუნი. [...] აქამდე უნივერსიტეტში შედარებით თავისუფლად გადავადგილდებოდით, დღეს ეს უფლება შეგვიზღუდეს და ფაქტობრივად ერთ ოთახში გამოგვკეტეს" — ჰყვება Facebook ლაივში, ზვიად ცეცხლაძე.

როგორც ახალგაზრდები ჰყვებიან, სტუდენტებს, რომლებიც უნივერსიტეტში ღამეს ათენებენ, შიდა სივრცეში გადაადგილება შეუზღუდეს, რაც გააპროტესტეს, სწორედ ამას მოყვა დაპირისპირებაც. ახალგაზრდები ამბობენ, რომ დაცვის თანამშრომლებს შორის იყო ერთი უცნობი პირიც, რომელიც ყველაზე მეტად აქტიურობდა. შედეგად, ორი ადამიანი დაშავდა და სასწრაფოს გამოძახება გახდა საჭირო.