ზუგდიდისა და ცაიშის მიტროპოლიტი, მეუფე გერასიმე ამბობს, რომ მისი აზრით, აღდგომა ერმაც და ბერმაც ერთად უნდა იზეიმოს, ისე, როგორც აქამდე. მისი თქმით, ამ თემაზე გადაწყვეტილებას საპატრიარქო მიიღებს და შემდეგ ყველას აცნობებს. მეუფე გერასიმემ სააღდგომო ლიტურგიასთან დაკავშირებით რუსთავი 2-თან ისაუბრა.

"ყველა მღვდელმთავარი უნდა იყოს თავის ეპარქიაში და ყველა მოძღვარი თავის სამრევლოში. თუ საჭირო იქნება ჩვენ აუცილებლად გვამცნობენ საპატრიარქოდან, თუ როგორ უნდა ვიმოქმედოთ და რანაირად ჩავატაროთ მომავალ კვირაში ღვთისმსახურება. მე რომ მკითხონ ვიტყოდი, რომ ყველამ ერთად ვიზეიმოთ აღდგომა, როგორც აქამდე ხდებოდა ხოლმე, ერმა და ბერმა", — თქვა მეუფე გერასიმემ.

დღეს მართლმადიდებელი ეკლესია ხარების დღესასწაულს აღნიშნავს. მიუხედავად საგანგებო მდგომარეობისა, დილიდან სამების საკათედრო ტაძარში და სხვა ეკლესიებშიც ჩატარდა ლიტურგია, რომელსაც მრევლი ესწრებოდა.

პირველ აპრილს პატრიარქმა ილია მეორემ გაავრცელა მიმართა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

სამი რეკომენდაცია:

  • კომენდანტის საათის გათვალისწინებით, ხვალიდან ლოცვები დაიწყოს შუა დღის 16:00 საათზე, ხოლო ყოველ დღე ეკლესია დაიკეტოს საღამოს 8 საათისთვის;
  • აუცილებელია ტაძრის ეზოში 1,5მ-ის დაშორებით დროულად გაკეთდეს ნიშნულები;
  • ყოველდღიურად ხშირად უნდა გაიწმინდოს ხატები და სიწმინდეები (სპირტისა და ვარდის წყლით), ასევე, დამუშავდეს იატაკი და ეკლესიაში მუდმივი მეთვალყურეობისთვის გამოიყოს პასუხისმგებელი პირები.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

მინისტრთა კაბინეტის წევრები უარს ამბობენ ეკლესიაში მისვლაზე და მოქალაქეებსაც სახლში დარჩენისკენ მოუწოდებენ.

ბოლო მონაცემებით, საქართველოში კორონავირუსით ინფიცირების 195 შემთხვევაა დადასტურებული.მათგან გამოჯანმრთელებულია 39, ხოლო გარდაცვლილია 2 ადამიანი. ჯანდაცვის სფეროს წარმომადგენლები ვირუსის გავრცელების პიკს აპრილის ბოლოს, სწორედ საეკლესიო დღესასწაულების დროს ელოდებიან.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: