31 მარტის მდგომარეობით მსოფლიოში:

• დადასტურებული შემთხვევა — 856 417;
• გარდაცვლილი — 42 088;
• გამოჯანმრთელებული — 177 023.

საქართველოში:

• დადასტურებული შემთხვევა — 110;
• გამოჯანმრთელებული — 21;
• კარანტინის რეჟიმში — 5 106;
• სტაციონარში მეთვალყურეობის ქვეშ — 294.

დღის ფაქტი: ამერიკაში ინფიცირების მინიმუმ ორჯერ მეტი შემთხვევაა დაფიქსირებული, ვიდრე ჩინეთში

ჩინეთში, სადაც ვირუსი პირველად დაფიქსირდა 81 518 შემთხვევაა დაფიქსირებული, ამერიკაში კი 187 321. ამ მხრივ ამერიკა ყველა ქვეყანას უსწრებს და ინფიცირებულთა რიცხვით რეკორდული მაჩველებნები აქვს.

ბოლო მონაცემებით, ამერიკაში 23 533 ახალი შემთხვევა დაფიქსირდა. გარდაცვლილია 3 850 ადამიანი.

დღის ფოტო: კომენდანტის საათის შემდეგ დაცარიელებული თბილისის ქუჩაში დარჩენილი ცუგა

• ნახეთ ფოტორეპორტაჟი "ცარიელი თბილისიდან"

დღის ფრაზა: "როცა თავს ცა გვაქვს ფირუზის, არ გვეშინია ვირუსის"

მეუფე ნიკოლოზმა კორონავირუსის პრევენციისთვის ბრძოლა ჯერ დევიზებით დაიწყო, როცა ერს შესთავაზა ფრაზა: არ გადაადო და არ გადაგედება. ახლა კი გადაწყვიტა მისი დამოკიდებულება უფრო რითმულად, ლექსის სახით გამოეხატა.

რა ხდება მსოფლიოში

• მსოფლიოში კორონავირუსით გარდაცვლილთა რიცხვმა 40 000-ს გადააჭარბა;
• ყველაზე მეტი კრიტიკული პაციენტი აშშ-შია. ეს რიცხვი სხვა ქვეყნების რაოდენობას მინიმუმ 25 000-ით აღემატება;
• აშშ-ის ინფექციური დაავადებების ინსტიტუტის დირექტორმა განაცხადა, რომ ქვეყანა მზად უნდა იყოს, რომ კორონავირუსით 100 000-ზე მეტი ადამიანი მოკვდება;
• მინესოტას შტატში ინფიცირებულთა 28% სამედიცინო სფეროს წარმომადგენლები არიან;
• ბელარუსში კორონავირუსით გარდაცვალების პირველი შემთხვევა დადასტურდა;
• Guardian-ის ინფორმაციით, საფრანგეთმა, იტალიამ, ესპანეთმა, დიდმა ბრიტანეთმა და რუსეთმა ერთ დღეში სიკვდილიანობით საკუთარი ყველაზე მაღალი მაჩვენებeლი დააფიქსირეს;
• ნიდერლანდებში გარდაცვლილთა რაოდენობამ 1 000-ს გადააჭარბა;
• დიდ ბრიტანეთში 13 წლის ბიჭი გარდაიცვალა, რომელიც კორონავირუსის ყველაზე ახალგაზრდა მსხვერპლია ქვეყანაში;
• სერბეთის მართლმადიდებელი ეკლესიის ეპისკოპოსი კორონავირუსით გარდაიცვალა;
• ბურუნდსა და სიერა ლეონეში ინფიცირების პირველი შემთხვევები დაფიქსირდა;
• კანადის პრემიერ-მინისტრის თქმით, $1,4 მილიარდ დახარჯავენ დიაგნოსტიკური ტესტირების ხელშესაწყობად, სამედიცინო ინვენტარისა და მედიკამენტების შესაძენად;
• CNN-ის წამყვანს კორონავირუსი დაუდასტურდა. ის აცხადებს, რომ თავს კარგად გრძნობს და მუშაობას სახლიდან აგრძელებს;
• კორონავირუსის გამო საზღვრების ჩაკეტვის შემდეგ, პორტუგალიურმა ავიაკომპანიამ 9 000-მდე თანამშრომელი დაითხოვა, რაც დასაქმებულების 90%-ს უდრის;
• კორონავირუსზე დეზინფორმაციის გავრცელების გამო ბრაზილიისა და ვენესუელის პრეზიდენტების პოსტები წაიშალა;
• თურქმენეთში სიტყვა "კორონავირუსი" აკრძალეს

დღის მთავარი ჰედლაინი მსოფლიო მედიაში

კლინიკის ექიმს, რომელსაც პუტინი ერთი კვირის წინ შეხვდა, კორონავირუსი დაუდგინდა

რუსეთში კომუნარკის საავადმყოფოს მთავარ ექიმს, დენის პროცენკოს კორონავირუსი დაუდგინა. პროცენკო ის ექიმია, რომელსაც 24 მარტს რუსეთის პრეზიდენტი ვლადიმერ პუტინი კომუნარკის კლინიკის ვიზიტისას შეხვდა.

კრემლის პრესსპიკერმა დმიტრი პესკოვმა განაცხადა, რომ პუტინი რეგულარულად იტარებს ტესტებს და ექიმთან კონტაქტის გამო არანაირი შეშფოთება არ უნდა არსებობდეს.

27 მარტს ცნობილი გახდა, რომ კორონავირუსი კრემლის ერთ-ერთ თანამშრომელს აქვს. მაშინაც პესკოვმა განაცხადა, რომ საშიშროება არ არსებობს, რადგან აღნიშნულ თანამშრომელს პუტინთან კონტაქტი არ ჰქონია. ამასთან, კორონავირუსი და პუტინი ირიბად დუმაშიც გადაიკვეთნენ, როცა საფრანგეთიდან დაბრუნებულმა დეპუტატმა თვითიზოლაცია დაარღვია და რუსეთის პრეზიდენტის მოსმენას დაესწრო.

რა ხდება საქართველოში

ქვეყანაში ვირუსით ინფიცირებულთა რიცხვი 110-მდე, გამოჯანმრთელებულთა კი 21-მდე გაიზარდა.

დილის 8 საათზე საქართველოში საყოველთაო კარანტინი ამოქმედდა. კარანტინის რეჟიმი სხვადასხვა შეზღუდვებს ითვალისწინებს, რომელთა შესახებ დამატებითი ინფორმაცია შეგიძლიათ ამ ბმულზე ნახოთ. დღეს კი ცნობილი გახდა, რომ 3 პირზე დაწესებული შეზღუდვა მანქანით არასრულწლოვნების გადაყვანასაც ეხება.

ტრანსპორტირება პრობლემად იქცა სხვადასხვა სფეროში დასაქმებულთათვისაც, რადგან საზოგადოებრივი ტრანსპორტი გაჩერებულია და მხოლოდ პირადი მანქანებით ან ტაქსებით გადაადგილება არის შესაძლებელი.

• გაიგეთ როგორ წავლენ სამსახურში მაღაზიების, აფთიაქების, ბანკების თანამშრომლები

დღესვე ცნობილი გახდა, რომ საკარანტინო შეზღუდვების მიუხედავადაც კი ეკლესია აზრს არ იცვლის და წირვები გაგრძელდება. საპატრიარქოს პრესსამსახურში ამბობენ, რომ "ახალ რეალობის გათვალისწინებით" ზოგიერთი ძველი რეკომენდაცია დაზუსტდება.

მნიშვნელოვანია ისიც, რომ ინფექციური საავადმყოფოს დირექტორის, თენგიზ ცერცვაძის განცხადებით, შიდა გავრცელების დაფიქსირების გამო, შეიმუშავეს ტესტირების ახალი პროტოკოლი, რომელიც პრინციპულად განსხვავდება დღემდე მოქმედისგან და უფრო მეტ ადამიანს შეეხება.

• გაიგეთ, ვის და რატომ ჩაუტარებენ ტესტს

სხვა მნიშვნელოვანი სიახლეები:

• დღეიდან ვალუტის გადამცვლელი პუნქტების მუშაობა დროებით ჩერდება;
• ოკუპირებული აფხაზეთიდან ზუგდიდში გადმოყვანილ ქალს კორონავირუსი დაუდასტურდა;
• 19 წლის პირს კორონავირუსი დაუდასტურდა, ის გურჯაანში დაკრძალვაზე იყო;
• ნიუ-იორკში საქართველოს მოქალაქე კორონავირუსით გარდაიცვალა;
• სოფლის მეურნეობის მინისტრის მოადგილე კორონავირუსისგან გამოჯანმრთელდა;
• კომუნალურებზე დახმარებები იქნება, ამაზე პრემიერი ისაუბრებს — კახა კალაძე;
• განათლების სამინისტრო საჯარო სკოლებს ონლაინსწავლებისთვის საკომუნიკაციოდ ქართულ ვებგვერდს სთავაზობს;
• მეტადონის პროგრამაში მონაწილე პირებს 5-დღიანი პერიოდისთვის საჭირო დოზას სახლში გაატანენ;
• ამსტერდამიდან საქართველოს 179 მოქალაქე დაბრუნდება სამშობლოში;

დღის მთავარი ჰედლაინი ქართულ მედიაში

ყველაზე მძიმე პაციენტს საუნივერსიტეტო კლინიკაში, პირველადი ტესტით კორონავირუსი აღარ აქვს

პირველი საუნივერსიტეტო კლინიკის დირექტორის, ლევან რატიანის განცხადებით, მათ კლინიკაში მყოფი ინფიცირებული პირველი პაციენტის მდგომარეობა მკვეთრად გაუმჯობესებულია. ექიმი აღნიშნავს, რომ იგი ყველაზე მძიმე მდგომარეობაში იყო, ახლა კი პირველადი ტესტით კორონავირუსი აღარ აქვს.

"24 საათში გავიმეორებთ ტესტს და იმედია, ხვალ ეს ქალი დატოვებს კლინიკას. ეს კიდევ ერთი მაგალითია იმისა, რომ კოვიდი არ არის მკვლელი", — ამბობს ლევან რატიანი.

დღის დამაიმედებელი ამბავი

ნიუ-იორკში კორონავირუსის სისხლის პლაზმით მკურნალობას შეეცდებიან

ნიუ-იორკის სისხლის დონაციის ცენტრი (NYBC) აშშ-ში პირველი ორგანიზაცია გახდა, რომელმაც COVID-19-ის მკურნალობისთვის კორონავირუსისგან გამოჯანმრთელებული ადამიანების პლაზმის შეგროვება დაიწყო.

გამოჯანმრთელებული ადამიანების სისხლის ინფიცირებულებისთვის გადასხმა მკურნალობის ერთ-ერთ ხერხს წარმოადგენს, მისი გამოყენება ისეთი ინფექციების წინააღმდეგაც სცადეს, როგორიც H1N1, SARS და MERS-ია. თუმცა მკურნალობა ყოველთვის წარმატებული არ ყოფილა — ზოგიერთი პაციენტი იკურნებოდა, ზოგი ვერა, განსხვავებული შედეგების მიზეზი კი უცნობია. რაც შეეხება მიმდინარე COVID-19-ის პანდემიას, ვაქცინის შექმნამდე პლაზმაზე დაფუძნებული მკურნალობის გზა, შესაძლოა, ეფექტური აღმოჩნდეს.

• გაიგეთ მეტი

ამბავი, რომელმაც გაგვაღიმა

საქართველოს ეროვნული ნაკრების ვიცე-კაპიტანმა, გურამ კაშიამ თვითიზოლაციაში ყოფნისას "ახალი მოწოდება იპოვა" და მცველის კარიერას კომენტატორობა ამჯობინა. სახლში მან ნაკრების თერთმეტეული შეკრიბა და არც მეტი არც ნაკლები, პლეი ოფის მატჩი გამართა.

თუმცა იმისთვის, რომ სოციალური დისტანციის რეკომენდაცია არ დაერღვია, მატჩზე ფეხბურთელები არ მიუწვევია. თუ გგონიათ, რომ ასე არაფერი გამოუვიდოდა, ცდებით.

ამ ფორმით ფეხბურთელმა მოუწოდა მოსახლეობას დარჩნენ სახლში და დაიცვან სოციალური დისტანცია.

დღის სასარგებლო ინფორმაცია

როგორ არ შევიძულოთ ადამიანები, რომლებთან ერთადაც კარანტინში ვართ

იზოლაციის შემსწავლელი ექსპერტები გვაფრთხილებენ: ეს ძნელია, ეს გუნდურ მუშაობას მოითხოვს და მან სივრცეში თვალის გაშტერება იცის.

• გაიგეთ მეტი

ერთად თავმოყრილი რეკომენდაციები:

• ჯანდაცვის მსოფლიო ორგანიზაციის აუცილებელი რეკომენდაციები კორონავირუსისგან დასაცავად

• ჯანდაცვის სამინისტროს რეკომენდაციები ჟურნალისტებისთვის

• რეკომენდაციები თვითიზოლაციაში მყოფი პირებისთვის

• როგორ უნდა გაიკეთოთ, გამოიყენოთ და გადააგდოთ ნიღაბი

• როგორ დავიბანოთ ხელები სწორად კორონავირუსისგან დასაცავად

• როგორ ვიზრუნოთ ფსიქიკურ ჯანმრთელობაზე კორონავირუსის დროს

ნახეთ წინა შეჯამებები:

• "ფაქტობრივი" საყოველთაო კარანტინი და ფატალური შემთხვევები ევროპაში — 30 მარტის შეჯამება
• ვირუსი, როგორც "მწარე წამალი" და დედამიწიდან ფულის ერთეულის "გასაქრობი" საშუალება — 29 მარტის შეჯამება
• გაბრაზებული იმნაძე, ინფიცირების უცნობი წყარო და 18000 ახალი შემთხვევა აშშ-ში — 28 მარტის შეჯამება
• 27 მარტი: ბორის ჯონსონის კორონავირუსი და უკან დაბრუნებული ტესტები — 27 მარტის შეჯამება
• 26 მარტი: $5 ტრილიონი ვირუსთან საბრძოლველად და დაჯარიმებული ჰუმანიტარული აქცია