8 ოქტომბერს ცნობილი გახდა, რომ ბათუმის პოლიციის უფროსად მამუკა კახიძე დაინიშნა. დანიშვნამდე ის ხელვაჩაურის პოლიციის რაიონული სამმართველოს უფროსის მოადგილედ მუშაობდა.

კახიძეს ბოლო ქონებრივი დეკლარაცია მიმდინარე წლის 7 აპრილს აქვს შევსებული. დეკლარაციის თანახმად, 2025 წელს მან აჭარის პოლიციის დეპარტამენტში განყოფილების უფროსის თანამდებობაზე ჯამში 37 433,54 ლარი მიიღო. ეს თვეში საშუალოდ დაახლოებით 3 119 ლარს შეადგენს.

უძრავი ქონება

დეკლარაციაში ერთადერთი უძრავი ქონება ფიქსირდება. 2024 წელს 29 000 აშშ დოლარად მამუკა კახიძემ ბათუმში, ტბელ აბუსერიძის ქუჩაზე მდებარე 80,6 კვ.მ ბინა შეიძინა, რომელიც 100%-ით მის საკუთრებაშია. დეკლარაციის თანახმად, ბინა მშენებარე და დაუსრულებელია.

მოძრავი ქონება

დეკლარაციის თანახმად, 2023 წელს 6 000 აშშ დოლარად შეძენილი Volkswagen Passat მეუღლის, მაია ოქროპირიძის სახელზეა რეგისტრირებული.

2025 წლის 25 დეკემბერს კახიძემ BMW 330 გაყიდა. ნასყიდობის ხელშეკრულება მომსახურების სააგენტოში გაფორმდა, რამაც 6 500 აშშ დოლარი შეადგინა. დეკლარაციის შენიშვნის გრაფის თანახმად, მანქანა 2024 წელს შეიძინა, თუმცა სააგენტოში მისი გადაფორმება 2025 წელს მოხდა.

ხარჯები

დეკლარაციაში გასავლად მითითებულია 17 500 ლარის ოდენობით სამომხმარებლო სესხის ნაწილობრივ დაფარვა. კახიძე დეკლარაციაში განმარტავს, რომ სესხი გაყიდული ავტომანქანის თანხით დაფარა. ის ასევე აღნიშნავს, რომ არცერთი სესხის ღირებულება 10 000 ლარს არ აღემატებოდა.

დეკლარაციის შევსების დროს, კახიძეს საქართველოს ბანკის სახელფასო ანგარიშზე 270,08 ლარი უფიქსირდებოდა, ხოლო საკრედიტო ანგარიშზე — 3,44 ლარი. მის მეუღლეს საქართველოს ბანკის ანგარიშებზე — 320 ლარი და 600 აშშ დოლარი.