27 მარტის მდგომარეობით მსოფლიოში:

  • დადასტურებული შემთხვევა — 585 040;
  • გარდაცვლილი — 26 819;
  • გამოჯანმრთელებული — 129 812.

საქართველოში:

  • დადასტურებული შემთხვევა — 83;
  • გამოჯანმრთელებული — 14;
  • კარანტინის რეჟიმში — 4 641;
  • სტაციონარში მეთვალყურეობის ქვეშ — 239.

დღის ფაქტი

ჩინეთში ჭკვიანი AI სათვალეებით კორონავირუსიან ადამიანებს პოულობენ

ჩინეთში დაცვის ოფიცრები AI-ზე დაფუძნებულ ჭკვიან სათვალეებს ატარებენ, რომელსაც სიცხიანი ადამიანების ამოცნობა შეუძლია. სათვალე ადამიანის ტემპერატურის გასაზომად თერმული გამოსახულების კამერას იყენებს და მას ფუნქციონირება ერთი მეტრის სიშორეზე შეუძლია.

დღის ფოტო

რომის პაპმა Urbi et orbi, საგანგებო ლოცვა და მიმართვა წარმოთქვა. პაპი ფრანცისკე წმ. პეტრეს ცარიელ მოედანზე იდგა, მისი მიმართვა კი პირდაპირ ეთერში გადაიცემოდა.

ფოტო: Getty Images

რა ხდება მსოფლიოში

დღის მთავარი ჰედლაინი მსოფლიო მედიაში

კორონავირუსი დიდი ბრიტანეთის პრემიერ-მინისტრს, ბორის ჯონსონს დაუდასტურდა

ფოტო: Getty Imaes

პრინც ჩარლზის შემდეგ კორონავირუსი პრემიერ-მინისტრ ბორის ჯონსონსაც დაუდასტურდა. როგორც ჯონსონმა ვიდეომიმართვისას თქვა, მას სიმპტომები ჰქონდა, რის შემდეგაც ტესტი გაიკეთა. ახლა ის თავის ორსულ საცოლესთან ერთად თვითიზოლაციაში იქნება.

გარდა ამისა, ცნობილია, რომ ბორის ჯონსონი დედოფალს პირადად 11 მარტის შემდეგ არ შეხვედრია. ყოველკვირეული შეხვედრები კი დისტანციურად გამართეს.

რა ხდება საქართველოში

27 მარტს საქართველოში ინფიცირებულთა რაოდენობა 83-მდე გაიზარდა, ამათგან 14 უკვე გამოჯანმრთელებულია. განხილვის ერთ-ერთი მთავარი თემა სწრაფი ტესტების საკითხი იყო, რომელიც საქართველოს უნდა შეეძინა.

ფოტო: Shenzhen Bioeasy Biotechnology

საქართველომ ხელშეკრულება გააფორმა კორონავირუსის დასადგენი ტესტების მწარმოებელ ჩინურ კომპანიასთან, რომლის პროდუქციის ხარისხი ესპანეთმა დაიწუნა და უკან დააბრუნა. ესპანეთში ამბობენ, რომ ტესტის შედეგებში უზუსტობა იყო.

Shenzhen Bioeasy Biotechnology-ს საქართველომ 215 000 სწრაფი ტესტი შეუკვეთა, რომლის ღირებულებაც, ხელშეკრულების მიხედვით, ტრანსპორტირების გარეშე 1 182 500 აშშ დოლარს შეადგენდა.

საქართველოს ჯანდაცვის მინისტრის მტკიცებით, კომპანიამ ხარვეზის შესახებ "ნოტა გამოაქვეყნა" და პროდუქცია ყველა ქვეყნიდან თავად გაიწვია. თუმცა, ასეთი დოკუმენტი საჯაროდ არ იძებნება და არც სამინისტროში პასუხობენ On.ge-ს კითხვას, რა ფორმით მიიღეს შეტყობინება და გაავრცელებენ თუ არა მას. ამასთან, ესპანეთში ჩინეთის ელჩი ამბობს, რომ Shenzhen Bioeasy Biotechnology-ს სამედიცინო პროდუქტების გაყიდვის ლიცენზია არ აქვს.

ეკატერინე ტიკარაძის თქმით, თანხა არ გადარიცხულა და ხელშეკრულებაც უკვე ანულირებულია. მინისტრის მოადგილე თამარ გაბუნია კი განმარტავს, რომ ეს ტესტები ქვეყანაში საერთოდ არ შემოსულა.

ამავე თემაზე:

სხვა მნიშვნელოვანი ამბები საქართველოში:

დღის მთავარი ჰედლაინი ქართულ მედიაში

საქართველოში კორონავირუსისგან უკვე 14 ადამიანი გამოჯანმრთელდა

საავადმყოფოდან გაწერის შემდეგ პაციენტი ორკვირიან თვითიზოლაციაში იქნება.

დღის ფრაზა: "დღეს არ არის სამეგობროსა და ოჯახებში შეკრების დრო და არც ეკლესიებში"

ფოტო: საქართველოს მთავრობა

დაავადებათა კონტროლის ცენტრის დირექტორის მოადგილემ, პაატა იმნაძემ მოსახლეობას ისევ მოუწოდა, რომ თავი შეიზღუდონ შეკრებისგან და დაიცვან სოციალური დისტანცია.

"ჩვენ ვრჩებით ერთ პოზიციაზე, რაც უფრო ნაკლები ადამიანი და კონტაქტები გვექნება... ძალიან მძიმეა ამის თქმა, მაგრამ ეს ეხება ყველას. მათ შორის ეხება, რა თქმა უნდა, ეკლესიასაც, ეხება სამეგობრო წრეებსაც, ეს ეხება დიდ ოჯახურ თავყრილობებსაც", — განაცხადა მან.

ამბავი, რომელმაც გაგვაღიმა

დიდ ბრიტანეთში გადაწყვიტეს, რომ კორონავირუსთან ბრძოლის წინა ხაზზე მყოფ ექიმებს მადლობა გადაუხადონ და საყოველთაო ტაშით მათ შრომასა და თავდადებას პატივი მიაგონ.

მადლიერება გამოხატეს ჰემფშირელი ექიმის, ტაილა პორტერის მიმართაც. ის დილით სამსახურში მიდიოდა, როდესაც მთელი ქუჩა გარეთ იყო გამოსული და მას ტაშს უკრავდა.

A paramedics neighbors give her a round of applause as she heads off for another nighttime shift from r/HumansBeingBros

დღის რჩევა

როგორ უნდა მოიქცეთ სახლიდან გასვლისას და სახლში დაბრუნებისას

მიუხედავად იმისა, რომ ქვეყანაში საგანგებო მდგომარეობაა გამოცხადებული და მოსახლეობას თვითიზოლაციის რეკომენდაცია აქვს მიცემული, მნიშვნელოვანია ვირუსის პრევენციისთვის დამატებითი ნაბიჯების გადადგმა.

იმისთვის, რომ აუცილებლობის შემთხვევაში სახლიდან გასვლისას დაცული იყოთ, 3-პუნქტიანი გეგმა უნდა შეასრულოთ:

  1. ჩაიცვით გრძელმკლავიანი ტანსაცმელი;
  2. შეიკარით თმა და არ გამოიყენოთ სამკაულები, მაკიაჟი ან კრემი;
  3. თუ გაქვთ პირბადე, აიფარეთ სახეზე მანამ, სანამ დატოვებთ სახლს.

ფოტო: გვანცა ნემსაძე / On.ge

გარეთ ყოფნისას ის წესები უნდა დაიცვათ, რომელიც ჯანდაცვის მსოფლიო ორგანიზაციამ და დაავადებათა კონტროლის ცენტრმა არაერთხელ გააჟღერა. კერძოდ:

  1. შეეცადეთ, არ გამოიყენოთ საზოგადოებრივი ტრანსპორტი;
  2. დაიცავით სოციალური დისტანცია: 1 მეტრი ღია სივრცეში, 2 მეტრი დახურულ სივრცეში;
  3. თუ სახლიდან გადიხართ ცხოველთან ერთად, შეეცადეთ არ მისცეთ მას ნება, შეეხოს სხვადასხვა ზედაპირს;
  4. როცა ეხებით ნებისმიერ ზედაპირს, თითებზე შემოიხვიეთ ერთჯერადი ხელსახოცი;
  5. გამოყენების შემდეგ, დაკუჭეთ ხელსახოცი და გადააგდეთ ნაგვის ყუთში;
  6. თუ რაიმეს შეეხებით, დაიბანეთ ხელი წესების შესაბამისად ან გამოიყენეთ სადეზინფექციო ხსნარი;
  7. თუ დაახველებთ ან დააცემინებთ, აიფარეთ იდაყვი;
  8. არ შეეხოთ სახეს, სანამ არ დაიბანთ ხელებს;
  9. შეეცადეთ, არ გამოიყენოთ ნაღდი ფული და ისარგებლეთ უკონტაქტო გადახდით.

მიუხედავად ზევით აღნიშნული პრევენციული ღონისძიებებისა, არ უნდა დაგავიწყდეთ, რომ სახლში შესვლის დროსაც მნიშვნელოვანია პრევენციული ნაბიჯების გადადგმა:

  1. შეეცადეთ, სახლში შესვლისას არაფერს შეეხოთ;
  2. შემოსასვლელში ყუთში ჩაალაგეთ ყველა ნივთი, რომელიც გარეთ გქონდათ: ჩანთა, საფულე, ტელეფონი, გასაღები და ა.შ.;
  3. გაიხადეთ ფეხსაცმელი;
  4. თუ ცხოველთან ერთად სეირნობდით, გაუწმინდეთ მას თათები სადეზინფექციო ხსნარით;
  5. გაიხადეთ და გარეცხეთ ტანსაცმელი, რომელიც გარეთ გეცვათ;
  6. მიიღეთ შხაპი, ან თუ არ არის შესაძლებელი კარგად დაიბანეთ სხეულის ყველა ხილული ნაწილი: ხელები, მაჯები, სახე, კისერი და ა.შ.;
  7. გაწმინდეთ ტელეფონი და სათვალე საპნიანი წყლით ან ალკოჰოლის შემცველი ხსნარით;
  8. გარეთ ნაყიდი ნივთები დაამუშავეთ სპეციალური ხსნარით და ამ დროს გამოიყენეთ ხელთათმანები;
  9. ფრთხილად მოიხსენით ხელთათმანები და გადააგდეთ ნაგვის ურნაში.

ერთად თავმოყრილი რეკომენდაციები:

ნახეთ წინა შეჯამებები: