23 მარტის მდგომარეობით

მსოფლიოში

• დადასტურებული შემთხვევა — 414 277;
• გარდაცვლილი — 18 557;
• გამოჯანმრთელებული — 107 806

საქართველოში

• დადასტურებული შემთხვევა - 70;
• გამოჯანმრთელებული - 9;
• კარანტინის რეჟიმში - 4 055

დღის ფაქტი

ტოკიოს ოლიმპიური თამაშები 2021 წლისთვის გადაიდო

ტოკიოს 2020 წლის ოლიმპიური თამაშების კორონავირუსის გამო 2021 წლისთვის გადაიდო. როგორც იაპონიის პრემიერ-მინისტრმა, შინძო აბემ განაცხადა, მან საერთაშორისო ოლიმპიურ კომიტეტთან შეთანხმებას მიაღწია.

კორონავირუსის პანდემიის გამო ბევრი საერთაშორისო ღონისძიება გადაიდო. ამ დრომდე ოლიმპიური თამაშების ბედი უცნობი იყო. ბევრი ქვეყანა მოუწოდებდა საერთაშორისო კომიტეტს, რომ სპორტული ღონისძიება გადაედოთ.

დღის ფოტო: ნიუ-იორკი, დაცარიელებული მანჰეტენი

დღის მთავარი ჰედლაინი მსოფლიო მედიაში

ამერიკა იმისთვის არ დაარსებულა, რომ დახურული იყოს — დონალდ ტრამპი

კორონავირუსთან დაკავშირებით გამართულ პრესკონფერენციაზე აშშ-ს პრეზიდენტმა, დონალდ ტრამპმა განაცხადა, რომ "ამერიკა ისევ და ძალიან მალე გაიხსნება ბიზნესისთვის". პრეზიდენტის თქმით, იგი აშშ-ს ეკონომიკას უახლოეს რამდენიმე კვირაში გამოიყვანს კორონავირუსის კრიზისისგან.

"ჩვენი ქვეყანა იმისთვის არ დაარსებულა, რომ დახურული იყოს... იმაზე მალე გაიხსნება, ვიდრე სამ-ოთხ თვეში, როგორც ამას გვთავაზობდნენ", — განაცხადა ტრამპმა მედიასთან შეხვედრისას, სადაც მასთან ერთად იყვნენ კორონავირუსთან ბრძოლის საბჭოს წევრებიც.

სხვა მნიშვნელოვანი ამბები მსოფლიოში:

• პოლონეთში, ინდოეთსა და ეგვიპტეში ქვეყნის მასშტაბით კარანტინი გამოაცხადეს. იგივეს გეგმავს სამხრეთ აფრიკა, სადაც მკვეთრად გაიზარდა კორონავირუსით ინფიცირებულთა რიცხვი. პოლონეთის პრემიერ-მინისტრმა მატეუს მორავიცკიმ ქუჩაში 2-ზე მეტი ადამიანის შეკრება აგრძალა. ინდოეთი კი, სადაც 1,3 მილიარდი ადამიანი ცხოვრობს, 21 დღით სრულად ჩაიკეტა.
• ჯანდაცვის მსოფლიო ორგანიზაციის განცხადებით, არის რისკები, აშშ გახდეს კორონავირუსის ეპიდაფეთქების მომდევნო ეპიცენტრი, რადგან ძალიან სწრაფად იზრდება ინფიცირებულთა რაოდენობა; ამ დროისთვის აშშ-ში 53 268 დადასტურებული შემთხვევაა.
• ესპანეთი მეორე ყველაზე მეტად დაინფიცირებული ქვეყანაა ევროპაშ იტალიის შემდეგ;
• გრეტა თუნბერგი ფიქრობს, რომ მას კორონავირუსი აქვს. ინსტაგრამის პოსტზე მან დაწერა, რომ ბოლო ორი კვირაა სახლშია, 10 დღის წინ კი სიმპტომები იგრძნო. იგი ამბობს, რომ ყელი ტკივა და ხველა აქვს;

• ჩინეთის ქალაქ უხანში, რომელიც კორონავირუსის გავრცელების ეპიცენტრი იყო, კარანტინი გაუქმდება. ჩინეთის ხელისუფლების განცხადებით, თითქმის ორი თვის შემდეგ, 8 აპრილიდან უხანი გარე სამყაროსგან იზოლირებული აღარ იქნება;

• მადრიდში, სავაჭრო ცენტრში მდებარე სასრიალო მოედანი დროებით მორგად გადაკეთდება, რათა ქალაქი მოულოდნელად მომატებულ სიკვდილიანობას გაუმკლავდეს. მადრიდის მერიის წარმომადგენლის თქმით, სავაჭრო ცენტრ Palacio de Hielo-ში განთავსებულ სასრიალო მოედანს, რომელიც 1800-მდე მოციგურავეს იტევს, "ცხედრების შესანახად" გამოიყენებენ.

დღის მთავარი ჰედლაინი ქართულ მედიაში

საქართველოში კორონავირუსისგან უკვე 9 პაციენტი გამოჯანმრთელდა

24 მარტისთვის საქართველოში კორონავირუსისგან 9 პაციენტი მიიჩნევა გამოჯანმრთელებულად. ამ დროის მონაცემებით, დაინფიცირებულია 70 ადამიანი. კარანტინის რეჟიმში არის 4 055 პირი.

სხვა მნიშვნელოვანი ამბები ქართულ მედიაში:

• ლარი დოლართან მიმართებით 21 თეთრით გაუფასურდა
• იგივეა, რაც მოქმედებს კარფურში, გუდვილში... დისტანცია უნდა დაიკავონ — გომელაური ეკლესიაზე
• კორონავირუსით ინფიცირების 3 ახალი შემთხვევა დადასტურდა, სულ — 70
• გახარია: 30 მარტიდან GPB-ს ეთერში სკოლის მოსწავლეებისთვის გაკვეთილების ტრანსლირება დაიწყება

დღის კარგი ამბავი

იტალიელი ფეხბურთელი, პაოლო მალდინი, რომელსაც კორონავირუსი დაუდგინდა, ამბობს, რომ თავს კარგად გრძნობს და "უარესი უკვე ჩავლილია". ამის შესახებ მან ინსტაგრამის საკუთარ გვერდზე ვიდეომიმართვა გამოაქვეყნა:

"ჯერ კიდევ მაქვს მშრალი ხველა, დავკარგე გემოსა და ყნოსვის შეგრძნება, მაგრამ იმედი მაქვს დამიბრუნდება. ამ ყველაფერს ძლიერი ეფექტი ჰქონდა ჩემს ორგანიზმზე. ტკივილი გაუსაძლისი იყო".

ამბავი, რომელმაც გაგვაღიმა

გათამამებული ცხოველები იზოლირებულ ქალაქებში ხეტიალს იწყებენ

იაპონიის ქალაქ ნარაში ირმებმა ქალაქის ქუჩები და მიწისქვეშა სადგურების მოინახულეს, ენოტები პანამის პლაჟებზე ნებივრობდნენ, ინდაურებმა კი კალიფორნიაში გამოჩენა გადაწყვიტეს. ველური ინდაურების ბანდები უცხო ნამდვილად არ ყოფილა, თუმცა ამჯერად მათ აქამდე უცნობი ადგილების მონახულება მოინდომეს.

ერთად თავმოყრილი რეკომენდაციები:

• ჯანდაცვის მსოფლიო ორგანიზაციის აუცილებელი რეკომენდაციები კორონავირუსისგან დასაცავად

• კორონავირუსის პრევენციისთვის საჭირო რჩევები მოგზაურებისთვის

• ჯანდაცვის სამინისტროს რეკომენდაციები ჟურნალისტებისთვის

• რეკომენდაციები თვითიზოლაციაში მყოფები პირებისთვის

• როგორ უნდა გაიკეთოთ, გამოიყენოთ და გადააგდოთ ნიღაბი

• როგორ დავიბანოთ ხელები სწორად კორონავირუსისგან დასაცავად

• როგორ ვიზრუნოთ ფსიქიკურ ჯანმრთელობაზე კორონავირუსის დროს

ნახეთ წინა შეჯამებები:

• ანგელა მერკელი კარანტინში და საკვირაო წირვები საქართველოში — 22 მარტის შეჯამება
• საქართველოს საგანგებო მდგომარეობა და გარდაცვლილთა ზრდა იტალიაში — 21 მარტის შეჯამება
• სოციალური დისტანცირება, როგორც გადარჩენის გზა — კორონავირუსის 20
• მარტის შეჯამება"გამარჯობა, თქვენ კორონას პაციენტთან ახლოს იყავით" – 19 მარტის შეჯამება
• ბრიტანეთი ჯოგური იმუნიტეტის ამბიციური გეგმიდან უკან იხევს – 18 მარტის შეჯამება
• შეჩერებული "მარშრუტკები" და ბრაზილიის ციხიდან გაქცეული პატიმრები – რა ხდებოდა 17 მარტს
• კორონავირუსი 16 მარტს: პირველი გამოჯანმრთელებული საქართველოში და ევროპის ჩაკეტვის მოლოდინი
• კორონავირუსი 15 მარტს: გამკაცრებული შეზღუდვები და ფანჯრები, როგორც ერთადერთი გასართობი
• მესამეული გადაცემის ფაქტი საქართველოში და კრიზისი ესპანეთში – 14 მარტის შეჯამება
• კორონავირუსი: სტატისტიკა და ახალი ამბები 13 მარტის მდგომარეობით
• კორონავირუსი: რა ხდება საქართველოსა და მსოფლიოში 12 მარტის მდგომარეობით.