დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

საქართველოში COVID-19-ით გარდაცვალების არც ერთი შემთხვევა არ დაფიქსირებულა. თუმცაღა, ჯანდაცვის სამინისტრომ ახალი კორონავირუსით გარდაცვლილთა დაკრძალვის წესები უკვე შეიმუშავა.

უწყების მიერ გავრცელებული დოკუმენტის მიხედვით, COVID-19-ით ინფიცირებული, ან საეჭვო პაციენტის გარდაცვალების შემთხვევაში, ცხედარის უნდა დაფაროს ზეწრით და მოთავსდეს გვამის წყალგაუმტარ ჩანთაში. ამის შემდეგ მას გადაიტანენ დროებითი დაყოვნების სათავსოში, სადაც ჩანთას გარედან გაუკეთდება ინფექციური საფრთხის მიმანიშნებელი საერთაშორისო სიმბოლო. ამასთან, გვამის ჩანთას გარედან დეზინფექცია უნდა ჩაუტარდეს.

როგორც დოკუმენტში ვკითხულობთ, ცხედრის დროებითი დაყოვნების სათავსოში განთავსებიდან მაქსიმუმ ერთ საათში, ოჯახსა და დამკრძალავ სამსახურს გარდაცვალებისა და დროული გადასვენების აუცილებლობის შესახებ უნდა აცნობონ.

ოჯახის წევრებმა და დამკრძალავმა სამსახურმა უნდა გაითვალისწინონ:

  • გვამი უნდა გადასვენდეს სასახლით, რომელშიც გვამი თავსდება ჩანთით, რომლის გახსნა მიცვალებულის გადასვენებისა და დაკრძალვის ნებისმიერ ეტაპზე აკრძალულია;
  • საჭიროა მიცვალებულის დროულად (არაუმეტეს 72 საათის განმავლობაში) დამარხვა და ხალხმრავალი პანაშვიდებისგან თავის შეკავება

ამასთან, COVID-19-ის დადასტურებულ, ან სავარაუდო შემთხვევაში, უნდა გამოირიცხოს გვამის ბალზამირება და ნებისმიერი დამატებითი კონტაქტი, მათ შორის პათოლოგ-ანატომიური გაკვეთა. გაკვეთის აუცილებლობის შემთხვევაში კი, მკაცრად უნდა იქნეს დაცული უსაფრთხოების მოთხოვნები.