თბილისში, რუსთაველის #12-ში, ყოფილი კავშირგაბმულობის სახლის დემონტაჟი მიმდინარეობს, რომლის ადგილზეც 11-სართულიანი სასტუმრო აშენდება და მასში კაზინო და სავაჭრო სივრცეც იქნება ინტეგრირებული. შენობა "ჯორჯიან ეარვეისის" დირექტორის, თამაზ გაიაშვილის კომპანია შპს "მარილი 2020-ს" ეკუთვნის და მისი 100%-იანი წილის მფლობელი თავადაა.

შენობა კულტურული მემკვიდრეობის ძეგლი არ არის, ამის შესახებ ორი დღის წინ თბილისის მერმაც ისაუბრა.

"სოციალურ ქსელებში ალბათ შეგხვდათ ვიდეოები, სადაც ავრცელებდნენ ცრუ ინფორმაციას, თითქოს ყოფილი კავშირგაბმულობის სამინისტროს შენობა წარმოადგენს კულტურული მემკვიდრეობის უძრავ ძეგლს და, შესაბამისად, მისი რეკონსტრუქცია დაუშვებელია. სრული პასუხისმგებლობით ვაცხადებ, რომ აღნიშნული შენობა კულტურული მემკვიდრეობის ძეგლს არ წარმოადგენს. ეს არ იქნება მრავალსართულიანი საცხოვრებელი კორპუსი, არამედ აქ განთავსდება სასტუმრო, სადაც, პროექტის თანახმად, შენარჩუნდება არსებული პორტალი – რუსთაველის გამზირის მხრიდან შესასვლელი", — განაცხადა კახა კალაძემ.

რა დრო დასჭირდება ქალაქის ცენტრალურ გამზირზე სასტუმროს აშენებას უცნობია. როგორც bm.ge წერს, თბილისის არქიტექტურის სამსახურმა პროექტთან დაკავშირებით სამშენებლო ნებართვა 2024 წელს გასცა. ახალი სასტუმროს საინვესტიციო ღირებულება 80 მილიონ დოლარს აღემატება.

მთლიანობაში შენობას 11 სართული ექნება, მათ შორის 3 მიწისქვეშ განთავსდება და 23,323 კვადრატულ მეტრს დაიკავებს. ახალ სასტუმროს 201 ნომერი ექნება.

ახალ ნაგებობის შუაში წრიული ფორმის შიდა ეზო განთავსდება. კომპლექსში კაზინოს გარდა კომერციული ფართებიც მოეწყობა, შენობის სახურავზე განთავსდება 118 კვადრატული მეტრის ფართობის აუზიც.

შენობის ისტორია

რუსთაველის გამზირის #12-ში არსებულ შენობის ისტორიაზე ვრცელ სტატიას აქვეყნებს "რადიო თავისუფლება". გამოცემა წერს, რომ თბილისის განაშენიანების კვალდაკვალ, რუსთაველის #12-ში 1877 წელს ივანე ბაგრატიონ-მუხრანელის სამსართულიანი სახლი აშენდა. პოლიტიკურ-ლიტერატურული გაზეთის, "დროების" რედაქციაც აქ ყოფილა. 1921 წელს სახლი ხანძარმა გაანადგურა. 1928 წელს კი თბილისის საქალაქო საბჭომ გადაწყვიტა, აქ კავშირგაბმულობის შენობა აეგო. მშენებლობა 1930 წელს დასრულდა. კავშირგაბმულობის სახლი ნაწილობრივ 90-იან წლებშიც დაიწვა, როდესაც რუსთაველზე სახელმწიფო გადატრიალება მოხდა. დღეს კი შენობა, როგორც უკვე ითქვა, თამაზ გაიაშვილის კომპანიას "მარილი-2020" ეკუთვნის.