ევროპული საქართველოს ერთ-ერთი ლიდერი, გიგა ბოკერია ყოფილ პრეზიდენტზე, მიხეილ სააკაშვილზე ამბობს, რომ ცუდია, რომ ქვეყნის ფარგლებს გარეთ მყოფმა ლიდერმა დაიწყო შეთქმულებასა და პროვოკაციაზე საუბარი.

ბოკერიას თქმით, შეთქმულების თეორიების გავრცელების დრო არ არის და ახლა წესების მკაცრად დაცვის დროა.

"დახმარება არ შეიძლება იქცეს საფრთხედ, ამიტომ აბსოლუტურად დაუშვებელია ის, როგორი ფორმითაც ეს ხდებოდა ზუდგიდში. ამიტომ ეს კრიტიკაც, რომელიც შეხვდა ამ ინციდენტს და ამ პოლიტიკურ ჯგუფს, იყო დამსახურებული. კარგი იყო, რომ ამ პოლიტიკური გაერთიანების ადგილობრივმა ლიდერებმა სწრაფადვე აღიარეს ეს მძიმე შეცდომა. ასევე, ცუდია რომ, ეს ინციდენტი სახელისუფლებო პროპაგანდამ და მთავრობამ გამოიყენა და იყენებს კამპანიისთვის ამ პოლიტიკური გუნდის და მთლიანად ოპოზიციის წინააღმდეგ. ესეც ცუდია, ამის დროც არ არის ახლა", — განაცხადა ბოკერიამ.

ბოკერიას თქმით, ევროპულ საქართველოს 50 მოხალისე ჰყავს, რომელმაც ლუგარის ლაბორატორიაში "მკაცრი" ტრენინგი გაიარა და წესებს "ზედმიწევნით" იცავს.

26 მარტს ზუგდიდში სააკაშვილის ინციიატივით, საპრეზიდენტო ბიბლიოთეკამ შეკრებილ მოქალაქეებს პირბადეები, ხელთათმანები და სადეზინფექციო ხსნარები დაურიგა, რასაც ხალხმრავლობა მოჰყვა და კრიტიკა გამოიწვია.

შინაგან საქმეთა სამინისტროს განცხადებით, ზუგდიდში ხალხმრავალი შეკრების გამო, ორგანიზატორი 15 000 ლარით დააჯარიმეს. უწყების განმარტებით, საგანგებო მდგომარეობის დროს 10-ზე მეტი ადამიანის შეკრება აკრძალულია, ზუგდიდში კი 100-ზე მეტი ადამიანი შეიკრიბა.

On.ge-ს ნაციონალურ მოძრაობაში განუცხადეს, რომ ზუგდიდში ხალხის შეკრება, პარტიის დაორგანიზებული არ იყო და ის სააკაშვილის საპრეზიდენტო ბიბლიოთეკის პროგრამაა. სააკაშვილმა კი განაცხადა, რომ ორგანიზატორები ამდენ ხალხს არ ელოდნენ და პატრულმა სიტუაცია ვერ გააკონტროლა.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: