ტელეკომპანია პირველის დამფუძნებლის, ვატო წერეთლის განცხადებით, ტელევიზიის ანგარიშებს ისევ ინკასო დაადეს. მისი თქმით, ამას ვერ წარმოიდგენდა მაშინ, როცა მთელი ქვეყანა კორონავირუსს ებრძვის, ბიზნესს წარმოუდგენელი გამოწვევები აქვს, ჟურნალისტები და ოპერატორები კი საკუთარ ჯანმრთელობას სასწორზე დებენ.

"ბატონებო, ჩვენი და თქვენი მტერი კორონაა და არა თავისუფალი მედია! გავიმეორებ : ხალხი აქ საკუთარ სიცოცხლეს საფრთხის ქვეშ აყენებს, თქვენ კი ამ ჟურნალისტებს, ოპერატორებს, მემონტაჟეებს, მძღოლებს შემოსავლის გარეშე ტოვებთ!!!" — წერს წერეთელი.

ტელეკომპანია პირველის წამყვანმა, დიანა ტრაპაიძემ პრემიერ-მინისტრის მრჩეველს, ირაკლი ჩიქოვანს ჰკითხა, აქვთ თუ არა რაიმე გეგმა, რომ ამ პერიოდში არ გატარდეს მსგავსი ტიპის მკაცრი პოლიტიკა და დავალიანების დროულად ვერგადახდისას ავტომატურად არ დაედოს ანგარიშებს ინკასო, რაზეც ჩიქოვანმა უპასუხა, რომ კონკრეტული ინფორმაცია არ აქვს, მაგრამ კომუნიკაციის პირობებში ყველანაირი წინააღმდეგობის გადალახვა შეიძლება.

"რეალობა არის ის, რომ ჩვენ ყველას ერთად მოგვიწევს გარკვეული სირთულეების გავლა. ყველას ერთად, როგორც ინდივიდუალურ საქართველოს მოქალაქეს, ისე იმ ბიზნესებს, რომლებიც საქართველოში ოპერირებენ. რა თქმა უნდა, ტელემედია საშუალებებსაც მოუწევთ სირთულეები და ჩვენ მაქსიმალურად ვმუშაობთ იმისთვის, რომ ამ გამოწვევის სიმძიმე იყოს შემცირებული", — განცხადა ჩიქოვანმა.

2019 წლის 15 დეკემბერს ფინანსთა სამინისტროს შემოსავლების სამსახურმა TV პირველს, კავკასიასა და რუსთავი 2-ს და ერთ-ერთ რეგიონულ მაუწყებელს ინკასო დაადო და ამით ტელევიზიებს ფინანსური ოპერაციები შეეზღუდა. TV პირველისა და კავკასიის წარმომადგენლები ამ გადაწყვეტილებას კრიტიკული მედიის გაჩუმების მცდელობად მიიჩნევდნენ. ისინი აცხადებდნენ, რომ იმ ფონზე, როცა ტელეკომპანია იმედსა და რუსთავი 2-ს გაცილებით უფრო მაღალი საგადასახადო დავალიანება ჰქონდათ, სამინისტრო მათ 10-წლიან რესტრუქტურიზაციას სთავაზობდა, მათ კი გადახდას.

კრიტიკის პასუხად ფინანსთა მინისტრი აცხადებდა, რომ მისი წინამორბედების დროს მიდგომა უსამართლო იყო და არ უნდა მიეცათ ამ არხებისთვის ამხელა ვალის დაგროვების უფლება, თუმცა ძველი უსამართლობით ახალი ვალის დაგროვება ვერ გამართლდებოდა.

2020 წლის 22 იანვარს ვატო წერეთელმა განაცხადა, რომ საგადასახადო დავალიანება გადაიხადეს და მათ ანგარიშებს ინკასო მოეხსნა და მან მინისტრი გამოიწვია, რომ იგივე პრინციპულობით მოეთხოვა ვალის დაფარვა სხვებისთვისაც.

20 თებერვალს კი ფინანსთა მინისტრმა, ივანე მაჭავარიანმა განაცხადა, რომ ტელეკომპანიებს, რომლებსაც ბიუჯეტის წინაშე დაგროვილი დავალიანება აქვთ, მათ მიერვე წარმოდგენილი 5-წლიანი გადახდის გრაფიკით უზრუნველყოფდნენ.