ინკასოდადებული ტელევიზიის წარმომადგენლებთან შეხვედრის შემდეგ ფინანსთა მინისტრმა, ივანე მაჭავარიანმა განაცხადა, რომ მათ ვალების ჩამოწერის და გადანაწილების ძველ მეთოდებზე აქვთ პრეტენზია. მისი თქმით, ძველი ვალის უსამართლობა არ იძლევა იმის საფუძველს, რომ ახალი დაგროვდეს.

"მეც ვაღიარებ, რომ ძველი არასწორი იყო, მაგრამ იმიტომ რომ ის არასწორი იყო გავაგრძელოთ TV პირველმა კიდევ დააგროვოს ვალი, რუსთავმა კიდევ დააგროვოს?" — ჰკითხა მინისტრმა ჟურნალისტებს და დაამატა:

"წაბრძანდით, 2010 წლის ჩამოწერა, 2012 წლის ჩამოწერა გამოიკვლიეთ და აგებინეთ პასუხი, საერთოდ არ მაინტერესებს".

მანვე აღნიშნა, რომ ხელისუფლების მაშინდელმა წარმომადგენლებმა ვერ გადადგეს ისეთი ქმედითი ნაბიჯები, როგორსაც მისი უწყება დგამს ახლა. მინისტრი იმითაც გაკვირვებული იყო, თუ რატომ მისცეს წინამორბედებმა 2016-2017 წლებში რუსთავი 2-ის იმის უფლება, რომ ამხელა ვალი დაეგროვებინა.

25 დეკემბერს ფინანსთა სამინისტროს შემოსავლების სამსახურმა TV პირველს, კავკასიასა და რუსთავი 2-ს და ერთ-ერთ რეგიონულ მაუწყებელს ინკასო დაადო. ამით ტელევიზიებს ფინანსური ოპერაციები შეეზღუდათ.

ფინანსთა სამინისტროში არ ამხელენ, ზუსტად რომელ ტელევიზიებს დაადეს ინკასო. პრესსამსახურში აცხადებენ, რომ ეს კომერციული საიდუმლოა. ინკასოდადებული ტელევიზიების ზუსტი რაოდენობა უცნობია, თუმცა TV პირველის, კავკასიისა და რუსთავი 2-ის წარმომადგენელები ინფორმაციას ადასტურებენ და ამას კრიტიკული მედიის წინააღმდეგ ბრძოლად აფასებენ.

ფინანსთა მინისტრთან დღევანდელი შეხვედრა პროტესტის ნიშნად დატოვა ტელეკომპანია პირველის დირექტორმა ინგა გრიგოლიამ. როგორც ინგა გრიგოლია ამბობს, მინისტრთან შეხვედრისას პროტესტი გაუჩინა იმან, რომ ვანო მაჭავარიანს "არ აინტერესებდა" რატომ იყვენენ მისულები ტელემაუწყებლების დირექტორები.