ტელეკომპანია პირველის დირექტორი ვატო წერეთელი აცხადებს, რომ საგადასახადო დავალიანება გადაიხადეს და მათ ანგარიშებს ინკასო მოეხსნა. ის ფინანსთა მინისტრ ივანე მაჭავარიანს მიმართავს, რომელიც აცხადებდა, რომ სამართლიანობისთვის დავალიანება ყველამ გადაიხადოს და "ჩელენჯს" სთავაზობს.

"მოდით დავიწყოთ ჩელენჯი — TV პირველი იხდის გადასახადებს და ვიწვევ სახელისუფლებო არხებს, გადაიხადონ მილიონები.

ველოდები მინისტრის პრინციპულობას, რომ ყველას ჩაარიცხინებს ხალხის კუთვნილ ფულს ბიუჯეტში. ბატონო მინისტრო, წამზომი ჩაირთო!" — წერს წერეთელი ფეისბუქგვერდზე.

ფინანსთა სამინისტროს შემოსავლების სამსახურმა TV პირველს, კავკასიას, რუსთავი 2-სა და ერთ-ერთ რეგიონულ მაუწყებელს ინკასო 2019 წლის 25 დეკემბერს დაადო. ამით ტელევიზიებს ფინანსური ოპერაციები შეეზღუდათ.

TV პირველისა და კავკასიის წარმომადგენლები ამ გადაწყვეტილებას კრიტიკული მედიის გაჩუმების მცდელობად მიიჩნევდნენ. ისინი აცხადებდნენ, რომ იმ ფონზე, როცა ტელეკომპანია იმედსა და რუსთავი 2-ს გაცილებით უფრო მაღალი საგადასახადო დავალიანება ჰქონდათ, სამინისტრო მათ 10-წლიან რესტრუქტურიზაციას სთავაზობდა, მათ კი გადახდას. კრიტიკის პასუხად ფინანსთა მინისტრი აცხადებდა, რომ მისი წინამორბედების დროს მიდგომა უსამართლო იყო და არ უნდა მიეცათ ამ არხებისთვის ამხელა ვალის დაგროვების უფლება, თუმცა ძველი უსამართლობით ახალი ვალის დაგროვება ვერ გამართლდებოდა.