ფინანსთა მინისტრის, ვანო მაჭავარიანის თქმით, ტელეკომპანიებს, რომლებსაც ბიუჯეტის წინაშე დაგროვილი დავალიანება აქვთ, მათ მიერვე წარმოდგენილი 5-წლიანი გადახდის გრაფიკით უზრუნველყოფენ ვალის გადახდას. ამის შესახებ ვანო მაჭავარიანმა დღეს, 20 თებერვალს, პარლამენტში მინისტრის საათის ფორმატში სიტყვით გამოსვლისას თქვა.

მისივე თქმით, ქვეყანაში მსხვილი ტელევიზიების მიერ ვალის გადაუხდელობა გარკვეულ ტრადიციად ჩამოყალიბდა, რაც ნიშნავდა ბიუჯეტში შემოსავლების დაკლებას და მნიშვნელოვნად აფერხებდა შედარებით მცირე ზომის ტელევიზიების განვითარებას.

"ჩვენ გასულ წელს საჯაროდ განვუმარტეთ ტელევიზიებს, რომ მსგავსი პრაქტიკის გაგრძელებას არ ვაპირებდით და ყველას მიმდინარე გადასახადების გადახდა მოვთხოვეთ. დამეთანხმებით, ეს პოლიტიკა თანაბარ პირობებში აყენებს ყველა ტელევიზიას და ამავდროულად აორმაგებს კერძო მაუწყებლების მიერ ბიუჯეტში გადახდილ თანხებს. ნათლად ჩანს, რომ ჩვენს მიერ გატარებულ ღონისძიებებს, 2020 წლის ბოლომდე დამატებით 22 მილიონი ლარის შემოსავალი მოაქვს ბიუჯეტში", — განაცხადა მაჭავარიანმა.

2019 წლიეს 15 დეკემბერს ფინანსთა სამინისტროს შემოსავლების სამსახურმა TV პირველს, კავკასიასა და რუსთავი 2-ს და ერთ-ერთ რეგიონულ მაუწყებელს ინკასო დაადო და ამით ტელევიზიებს ფინანსური ოპერაციები შეეზღუდათ.

აღნიშნული ტელებიზიების წარმომადგენლები ფინანსთა მინისტრთან შეხვედრის შემდეგ აცხადებედნენ, ფინანსთა სამინისტრო ტელეკომპანიებს, იმედსა და რუსთავი 2-ს რამდენიმე მილიონიანი ვალის ათწლიან რესტრუქტურიზაციას სთავაზობს.