18 წლის პოპვარსკვლავის, ბილი აილიშის შემოქმედებასთან ერთად ხშირად მის ჩაცმულობასაც აფასებენ, როგორც "უცნაურს" და "არასტანდარტულს". მომღერალმა ჯერ კიდევ გასულ წელს ისაუბრა, რომ ჩაცმის სტილით ცდილობს თავისი სხეულის ზედმეტი სექსუალიზება აირიდოს თავიდან.

სულ ცოტა ხნის წინ ბილი აილიშს მსოფლიო ტურნეს ფარგლებში კონცერტი ჰქონდა მაიამიში, რა დროსაც სცენაზე სპეციალური ვიდეო გაუშვა შთამაგონებელი სიტყვების თანხლებით.

"თუ ის მაცვია, რაც კომფორტულია, ქალი არ ვარ, ხოლო თუ გავიხდი, მაშინ ბოზი ვარ. მიუხედავად იმისა, რომ ჩემი სხეული არასდროს გინახავთ, მაინც განმსჯით. რატომ?" — ამბობს მომღერალი ვიდეოში.

ვიდეო კონცერტის ბოლოს, 22 სიმღერის შესრულების მერე გავიდა დიდ ეკრანზე. ორწუთიანი ვიდეოს განმავლობაში ბილი აილიში ნელ-ნელა იხდის ტანსაცმელს, ბოლოს კი მხოლოდ ბიუსტჰალტერი აცვია და ნელ-ნელა მუქ სითხეში იძირება.

გთავაზობთ მომღერლის სიტყვას სრულად:

"ნამდვილად იცით, ვინ ვარ?

თქვენი შეხედულებები გაქვთ ჩემს შეხედულებებზე, ჩემს მუსიკაზე, ჩემს ტანსაცმელზე, ჩემს სხეულზე.

ზოგს ეზიზღება ჩემი ჩაცმულობა, ზოგი კი — აქებს. ზოგიერთი ამას სხვების დასამცირებლად იყენებს, ზოგი კი ჩემს დასამცირებლად.

მაგრამ ვგრძნობ, რომ მაკვირდებით... და ყველაფერს, რასაც ვაკეთებ, მხედველობიდან არ გრჩებათ.

მართალია, ვგრძნობ თქვენს მოშტერებას და არაკეთილგანწყობას, მაგრამ ამ ყველაფრისთვის დიდი მნიშვნელობა რომ მიმენიჭებინა, მოძრაობის უნარსაც კი დავკარგავდი.

ისურვებდით, რომ უფრო პატარა ვიყო? უფრო სუსტი? უფრო ნაზი? უფრო მაღალი?

ისურვებდით, რომ ჩუმად ვიყო?

გაღიზიანებთ ჩემი მხრები? ჩემი მკერდი? მე ის ვარ, რაც ჩემი მუცელია ან ჩემი ბარძაყი?

სხეული, რომლითაც დავიბადე, ის არაა, რაც თქვენ გინდოდათ?

თუ ის მაცვია, რაც კომფორტულია, ქალი არ ვარ, ხოლო თუ გავიხდი, მაშინ მეძავი ვარ.

მიუხედავად იმისა, რომ ჩემი სხეული არასდროს გინახავთ, მაინც განმსჯით. რატომ?

ადამიანებს მათი სხეულის ზომების მიხედვით განსჯით. ჩვენ ვწყვეტთ, თუ ვინ არიან ისინი. ჩვენ ვწყვეტთ, თუ რისი ღირსები არიან.

ბევრი მაცვია თუ ნაკლები, ვინ წყვეტს, თუ რას წარმოვადგენ მე? რა მნიშვნელობა აქვს ამას?

ჩემს ღირებულებას მხოლოდ თქვენი წარმოდგენები განსაზღვრავს?

თუ თქვენი შეხედულებები ჩემ შესახებ ჩემი პასუხისმგებლობა არ არის?"