იტალიაში, ლომბარდიის რეგიონსა და 14 პროვინციაში, 16 მილიონი ადამიანი სავალდებულო კარანტინში იმყოფება. ამის შესახებ ინფორმაციას BBC იტალიის პრემიერ-მინისტრ, ჯუზეპე კონტეს განცხადებაზე დაყრდნობით ავრცელებს. მათივე ინფორმაციით, კარანტინი 3 აპრილამდე გაგრძელდება.

როგორც გამოცემა წერს, კორონავირუსის გავრცელების შესაჩერებლად იტალიაში დაიხურება სპორტული დარბაზები, აუზები, მუზეუმები და სათხილამურო კურორტები. ასევე, სავალდებულო კარანტინის პერიოდში გაუქმებულია საქორწილო და დაკრძალვის ცერემონიებიც.

ქვეყანაში კორონავირუსით გარდაცვლილთა რაოდენობა ბოლო 24 საათის განმავლობაში 50-ით გაიზარდა და ჯამში 230-ს გადააჭარბა. ამავე პერიოდში 1 200 ახალი შემთხვევა დადასტურდა და დაინფიცირებულთა საერთო რაოდენობა 5 883-მდე გაიზარდა.

6 მარტს, უწყებათაშორისი საკოორდინაციო საბჭოს გადაწყვეტილებით, კორონავირუსის გავრცელების პრევენციის მიზნით იტალიასთან პირდაპირი ფრენები დროებით შეჩერდა. პირდაპირი ფრენების შეჩერებასთან ერთად კორონავირუსის მაღალი რისკის ქვეყნებიდან საქართველოში ჩამოსული პირებისთვის 14-დღიანი კარანტინი სავალდებულო გახდა. წესი ვრცელდება, როგორც საქართველოს, ასევე, უცხო ქვეყნის მოქალაქეებზე, თუ მათ არ აქვთ შემოწმების სპეციალური ცნობა.

საგარეო საქმეთა სამინისტროს განცხადებით, უახლოეს დღეებში იტალიიდან 95 საქართველოს მოქალაქეს ჩამოიყვანენ. იმ მოქალაქეებმა, რომლებმაც ბოლო 2 კვირის განმავლობაში შეიძინეს ან დაჯავშნეს ბილეთები იტალიაში საქართველოს საელჩოს უნდა მიმართონ და დოკუმენტები წარუდგინონ.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: