ვაშინგტონის უნივერსიტეტმა კორონავირუსთან ბრძოლის განსხვავებული მეთოდი შემოგვთავაზა.

უნივერსიტეტის ახალ თავსატეხ თამაშში მეცნიერებმა და მოხალისეებმა ისეთი ცილა უნდა ააგონ, რომელიც ვირუსს ადამიანის უჯრედებში შეღწევის საშუალებას არ მისცემს. თამაში Foldit-ზე, 12 წლის წინ უნივერსიტეტის მიერ შექმნილ ვებგვერდზეა ხელმისაწვდომი, სადაც დარეგისტრირებულ მოთამაშეებს თამაშების მეშვეობით სხვადასხვა მნიშვნელოვანი ცილის კვლევაში საკუთარი წვლილი შეაქვთ. თამაშის მსვლელობისას შექმნილ ყველაზე დამაიმედებელ ცილებს კი მეცნიერები გამოცდიან.

COVID-19-მა მსოფლიოს გარშემო 89 000-ზე მეტი ადამიანი დააინფიცირა, 3 000-ზე მეტი კი იმსხვერპლა. კორონავირუსი მხოლოდ ამ კონკრეტული ვირუსის სახელწოდება არ არის, იგი ვირუსების იმ ჯგუფის სახელია, რომელთა გარშემოც შემორტყმული ცილები გვირგვინის ფორმას ქმნიან. "კორონა" ლათინური სიტყვაა და გვირგვინს ნიშნავს.

Foldit-ის განმარტებით, კორონავირუსი მაშინ ვრცელდება, როდესაც მის ზედაპირზე არსებული ცილები ადამიანის უჯრედის ზედაპირზე არსებულ ცილა რეცეპტორებს მჭიდროდ უკავშირდებიან. პროცესის დასრულების შემდეგ ადამიანის უჯრედი ინფიცირდება და ვირუსი გამრავლებას იწყებს.

"ახლახან მკვლევრებმა COVID-19-ის ზედაპირის ცილის სტრუქტურისა და მისი ადამიანის რეცეპტორთან დაკავშირების მექანიზმის შესწავლა მოახერხეს, თუკი ჩვენ ისეთ ცილას შექმნით, რომელიც ვირუსის ზედაპირის პროტეინს დაუკავშირდება, შესაძლოა, მან ვირუსის ადამიანის უჯრედდთან კავშირი დაბლოკოს", — ნათქვამია თამაშის აღწერაში.

ვირუსმა ყველაზე მეტად ჩინეთი დააზარალა, დაფიქსირებული შემთხვევების 90%-ს სწორედ ამ ქვეყანაში ვხვდებით.

უსაფრთხოების სერიოზულ ზომებს იღებენ კომპანიებიც, რათა ვირუსის გავრცელებას ხელი შეუშალონ. მაგალითად, Amazon-მა და Google-მა დასაქმებულებს მოგზაურობა აუკრძალა და გადაიდო რამდენიმე მასშტაბური კონფერენციაც.