ადამიანის უფლებების სწავლებისა და მონიტორინგის ცენტრი (EMC) აჭარის მაუწყებლის დირექტორის გადაწყვეტილებას აკრიტიკებს და საინფორმაციო სამსახურში მიმდინარე პროცესებს "მძიმეს" უწოდებს.

დღეს გიორგი კოხრეიძემ სამსახურიდან გაათავისუფლა საზოგადოებრივი მაუწყებლის აჭარის ტელევიზიისა და რადიოს საინფორმაციო სამსახურის უფროსი, შორენა ღლონტი.

"მაუწყებლის სარედაქციო დამოუკიდებლობა საგანგაშო რისკების წინაშე დგას და დაუყოვნებელი ზომების მიღებას საჭიროებს", — აცხადებს EMC.

ცენტრის განცხადებით, ბოლო დღეების განმავლობაში მართავდნენ სამუშაო შეხვედრებს მაუწყებლის რედაქტორებთან და ჟურნალისტებთან, რის შემდეგაც ტელეკომპანიაში არსებულ სიტუაციას "კრიტიკულად მძიმედ" აფასებენ.

EMC-ში მიიჩნევენ, რომ აჭარის მაუწყებელი პოლიტიკური გავლენებისგან თავისუფალი იყო, იქამდე, სანამ ყოფილი დირექტორი ნათია კაპანაძე არ გაათავისუფლეს. მდგომარეობის გაუარესებას არასამთავრობო ორგანიზაცია ახალ მენეჯმენტს უკავშირებს.

ადამიანის უფლებების სწავლებისა და მონიტორინგის ცენტრის განცხადებით, კოხრეიძის მოსვლის შემდეგ, საინფორმაციო სამსახურის თანამშრომლებზე ზეწოლა მიმდინარეობს. ორგანიზაციაში იხსენებენ სამსახურიდან დირექტორის მოადგილის, ნათია ზოიძის წასვლას და ახალი ამბების სარედაქციო მიმართულებით უფროსის მოადგილის პოზიციიდან რადიო მაუწყებლობის სამსახურში გადაყვანილ მაია მერკვილაძეს:

"ახალმა დირექტორმა სარედაქციო პოლიტიკის განსაზღვრაზე პასუხისმგებელი ყველა საკვანძო პოზიციის მქონე პირი გაათავისუფლა და მაუწყებლის სარედაქციო დამოუკიდებლობა საგანგაშო რისკების წინაშე დააყენა".

EMC-ის განცხადებით, მაუწყებლის თანამშრომლებმა შეხვედრისას აღნიშნეს, რომ მათი ის ნაწილი, ვინც საჯარო გამოხატავს კრიტიკას ახალი დირექტორის გადაწყვეტილებების მიმართ, შევიწროების ობიექტი ხდება:

"გროვდება მათთან დაკავშირებული ინფორმაციები, რაც ჟურნალისტების მიმართ მტრულ სამუშაო გარემოს ქმნის. ის ჟურნალისტები და ტელეწამყვანები, რომლებიც ამ პერიოდის მანძილზე ღიად იბრძვიან სარედაქციო დამოუკიდებლობის დასაცავად, შესაძლოა, ასევე გახდნენ შევიწროების, პოზიციური ცვლილებებისა და უკანონო გათავისუფლების მსხვერპლი".

EMC საქართველოს პარლამენტსა და აჭარის ავტონომიური რესპუბლიკის უმაღლეს საბჭოს მოუწოდებს, დაუყოვნებლივ გამოიყენონ საპარლამენტო კონტროლის ქმედითი მექანიზმები, რათა აჭარის მაუწყებლის სარედაქციო პოლიტიკის დამოუკიდებლობა აღდგეს. ორგანიზაცია ასევე ჟურნალისტების შრომითი უფლებების დაცვას და მაუწყებლის სარედაქციო და ორგანიზაციული დამოუკიდებლობის ინსტიტუციური გარანტიების გაძლიერებას ითხოვს.