სერგეი ლავროვისა და მარია ზახაროვას შემდეგ ქართველ ჟურნალისტებს შეურაცხყოფას ახლა უკვე რუსეთის პარლამენტის ზედა პალატის სენატორი, ალექსი პუშკოვი აყენებს. ტვიტერზე ქართველ ჟურნალისტებს მან "ეგზალტირებული ქალბატონები" უწოდა.

"რბილად რომ ვთქვა, ქართველი ჟურნალისტები საკმაოდ ეგზალტირებული ქალბატონები არიან. არაერთხელ განმიცდია მათი ზეწოლა ჩემზე — მოსკოვშიც, ევროსაბჭოში სტრასბურგშიც. ისინი ნიმუშად აგრესიულ-ისტერიკული ჟურნალისტიკის ყველაზე ცუდ მაგალითს იღებენ. მათ ჰგონიათ, რომ პასუხი ფესვებით უნდა ამოგლიჯონ", — წერს პუშკოვი.

რუსეთის საგარეო საქმეთა მინისტრმა, სერგეი ლავროვმა ქართველ ჟურნალისტებს შეურაცხყოფა დღეს, 25 თებერვალს მიაყენა. "თქვენ ავადმყოფები ხართ გოგოებო" — უთხრა მან ჟურნალისტებს, რომლებიც კითხვას უსვამდნენ საქართველოში ევროსაბჭოს მინისტერიალზე ჩამოსვლის შესახებ.

ამის შემდეგ ქართველი ჟურნალლისტები შეურაცხმყოფელად მოიხსენია საგარეო საქმეთა სამინისტროს პრესსპიკერმა, მარია ზახაროვამ. ფეისბუქის პოსტზე მარია ზახაროვან ქართველ ჟურნალისტებს "ყოველგვარ ღირსებადაკარგულ ქალები" უწოდა. მისი თქმით, ჟენევაში სერგეი ლავროვთან ინტერვიუს ჩაწერის მცდელობა "საცოდავი სანახაობა" იყო.

"იცით რა უნდოდათ? შეუძლებელია ამის დაჯერება! ერთი კითხვა: ჩავა თუ არა ლავროვი თბილისში. ეს უკვე გონების დაბინდვაა, ამდენად დამოკიდებული გაიხადო თავი სხვა ქვეყნის მთავრობის ჩასვლის ან არჩასვლის გამო", — წერს ზახაროვა ირონიულად.

გარდა ამისა, ის ამტკიცებდა, რომ შეხლა-შემოხლისას კოლეგასთან ერთად "დაშავდა", მაგრამ მთავარია, რომ "შეფი" [სერგეი ლავროვი] არ დაზარალებულა.

ამავე თემაზე: