აჭარის საზოგადოებრივი მაუწყებლის თანამშრომლები მაუწყებლის წინ თავიანთი დირექტორის, გიორგი კოხრეიძის გადაწყვეტილების აპროტესტებენ, რომლის მიხედვითაც მაია მერკვილაძე საინფორმაციო სამსახურს "ჩამოშორდა". როგორც მაუწყებლის თანამშრომლები აცხადებენ, რედაქციაზე შეტევა მთელი ძალით მიმდინარეობს.

"გიორგი კოხრეიძე მიზნის მისაღწევად სვლას განაგრძობს - ის რაც მოსალოდნელი იყო გამართლდა — "კივილად და წივილად" შეფასებული ვარაუდი გადაწყვეტილებად იქცა. რედაქციაზე შეტევა მთელი ძალით მიმდინარეობს. გაირკვა, რომ დირექტორი მერკვილაძეს არარსებულ, ბუტაფორიულ თოქ-შოუს, ან რადიოში რედაქტორობას სთავაზობს. ახალ ამბებში, კონკურსის გარეშე რედაქტორად კი ნინო ხაჟომია მოჰყავს. თან ისე რომ ამის შესახებ ახალი ამბების სამსახურის უფროსმა საერთოდ არაფერი იცოდა. მიზანი და ნაბიჯები დიდი ხანია ცხადია - ცხადი გახდა ადრეც და ახლაც, როდესაც მრჩეველთა საბჭოს სხდომაზე ორგანიზებული ჯგუფები მივიდნენ. სამოქალაქო საზოგადოების წევრებმა მაშინ სოციალურ ქსელში ისიც კი დაწერეს, რომ აჭარის ტელევიზიის დაპატრონებაში ღიად სუს-ი ჩაერთო", — აცხადებენ მაუწყებლის თანამშრომლები.

აჭარის მაუწყებლის ახალი ამბების რედაქტორად ნინო ხაჟომია დანიშნეს. აქამდე რვასაათიანი საინფორმაციო გამოშვების რედაქტორი მაია მერკვილაძე იყო. ის საინფორმაციო სამსახურის უფროსის მოადგილე იყო, აღნიშნული თანამდებობა კი, მრჩეველთა საბჭოს მხარდაჭერით რამდენიმე დღის წინ გაუქმდა.

აჭარის ტელევიზიაში განვითარებული მოვლენები მოკლედ

აჭარის მაუწყებელში დირექტორის, ნათია კაპანაძის გადაყენების შემდეგ მოსალოდნელ საფრთხეებზე საუბრობდნენ. ტელევიზიების თანამშრომლებს მიაჩნდათ, რომ ხელისუფლება მათზე გავლენის მოპოვებას ცდილობდა. დირექტორის გადაყენებიდან რვა თვის განმავლობაში კონკურსი სამჯერ ჩაიშალა, მეოთხე ცდაზე კი მმართველი პარტიისგან დაკომპლექტებულმა საბჭომ გიორგი კოხრეიძე აირჩია, რომლის მიმართაც თანამშრომლებს კითხვები აქვთ.

აჭარის ტელევიზიის თანამშრომლების ნაწილი ჯერ კიდევ კენჭისყრამდე ამბობდა, რომ კოხრეიძის არჩევით სარედაქციო დამოუკიდებლობას საფრთხე შეექმნებოდა. კოხრეიძემ დანიშვნის დღესვე არხის მთავარ საინფორმაციო გამოშვებაში სტუმრობისას განაცხდა, რომ ჟურნალისტებს კრიტიკულ ტონს უწუნებდა. ამავე ეთერში მან უყვირა წამყვანს, თეონა ბაკურიძეს, რაც იმით განმარტა, რომ ჟურნალისტი მის კითხვებს არ პასუხობდა. საუბრის გაგრძელების შემდეგ კი მან აჭარის მთავრობის თავმჯდომარე თორნიკე რიჟვაძე გაამართლა, რომელმაც ბაკურიძეს ეთერში "დაოკებისკენ" მოუწოდა. კოხრეიძის თქმით, ამ რეპლიკამდე რიჟვაძე წამყვანმა მიიყვანა.

კოხრეიძის არჩევის შემდეგ აჭარის ტელევიზია დატოვეს მაუწყებლის კონსულტანტმა ზვიად ქორიძემ და მედიამენეჯერმა, მარინა ვაშაყმაძემ. ტელევიზიიდან წავიდა დირექტორის ყოფილი მოადგილე, ნათია ზოიძეც. ის აცხადებდა, რომ კოხრეიძე სარედაქციო პოლიტიკისგან ჩამოშორებისკენ მოუწოდებდა ან სისხლის სამართლებრივი დევნით ემუქრებოდა.