აჭარის საზოგადოებრივ მაუწყებელს მედიამენეჯერი მარინა ვაშაყმაძე ტოვებს, რომელიც დირექტორის კონსულტანტი იყო. თანამდებობის დატოვების გადაწყეტილება ვაშაყმაძემ მაუწყებლის დირექტორად გიორგი კოხრეიძის არჩევის შემდეგ მიიღო. ამის შესახებ ინფორმაციას აჭარის საზოგადოებრივი მაუწყებელი ავრცელებს.

მარინა ვაშაყმაძე აჭარის საზოგადოებრივი მაუწყებლში ყოფილი დირექტორის ნათია კაპანაძის მიწვევით 2018 წლის 21 მარტიდან მუშაობდა. იგი ჩართული იყო აჭარის საზოგადოებრივი მაუწყებლის ახალი ვებგვერდის კონცეფციის შექმნასა და ამ პროექტის განცხორციელებაში. ასევე, მონაწილეობდა დონორებთან, უცხოურ მაუწყებლებთან და საერთაშორისო ორგანიზაციებთან მოლაპარაკებების პროცესში და წარმოადგენდა აჭარის საზოგადოებრივ მაუწყებელს.

ვაშაყმაძის მსგავსად არხს ნათია კაპანაძის მიერ მიწვეული კიდევ ერთი კონსულტანტი ზვიად ქორიძეც ტოვებს. თანამდებობის დატოვების შესახებ ქორიძემ განცხადებით გიორგი კოხრეიძეს დღეს მიმართა.

ნათია კაპანაძე აჭარის ტელევიზიის მრჩეველთა საბჭომ ხმათა უმრავლესობით დირექტორის თანამდებობიდან რვა თვის წინ გადააყენა. იმპიჩმენტის მიზეზად მრჩეველთა საბჭომ მნიშვნელოვანი პრიორიტეტების შეუსრულებლობა დაასახელა, კაპანაძე კი სარედაქციო პოლიტიკას უკავშირებდა. ამასთან, საერთაშორისო ორგანიზაციების მიერ არხი მიუკერძოებლად და დაბალანსებულად პირველად სწორედ კაპანაძის მმართველობის პერიოდში შეფასდა.

იმპიჩმენტის შემდეგ აჭარის ტელევიზიამ დირექტორის არჩევა რვა თვის განმავლობაში ვერ შეძლო. გასულ კვირას კი ქართული ოცნების უმრავლესობით დაკომპლექტებულმა ახალმა მრჩეველთა საბჭომ მეოთხე მცდელობაზე დირექტორად გიორგი კოხრეიძე აირჩია. ახალი დირექტორის დანიშვნაში ჟურნალისტების ნაწილი სარედაქციო დამოუკიდებლობის საფრთხეს ხედავს. გიორგი კოხრეიძემ დანიშვნის დღესვე არხის მთავარ საინფორმაციო გამოშვებაში სტუმრობისას განაცხდა, რომ არხს კრიტიკულ ტონს უწუნებდა.