ცნობილი ბრიტანელი კოსმეტიკური ქირურგიის ექსპერტი, ჯულიან დე სილვა მსოფლიოში აღიარებული მსახიობი კაცების გარეგნობას "სპეციალური მეცნიერული ტექნიკით" შეისწავლიდა და აღმოაჩინა, რომ მათ შორის ყველაზე სიმპათიური 33 წლის რობერტ პატინსონია.

ქირურგმა ამის დასადგენად ანტიკური ბერძნული გამოთვლის სისტემა, ეგრეთ წოდებული "ოქროს კვეთა" გამოიყენა, რომელსაც არქიტექტურასა და მხატვრობაში ხშირად მიმართავდნენ რენესანსის ეპოქის ხელოვანები.

ამ გამოთვლების მიხედვით პატინსონის თვალების, წარბების, ტუჩების, ცხვირის, ნიკაპისა და სახის ზოგადი მოყვანილობის თანაფარდობა ოქროს კვეთის იდეალურ ფორმას 92.15%-ით შეესაბამება.

ამავე გამოთვლებით მეორე ადგილზე ჰენრი კავილი (91.64%), მესამეზე ბრედლი კუპერი (91.08%), მეოთხეზე ბრედ პიტი (90.51%) და მეხუთეზე ჯორჯ კლუნი (89.91%) გავიდა.

აღსანიშნავია, რომ გასულ წელს მსგავსი მონაცემები იმავე ქირურგმა ქალების შემთხვევაშიც გამოაქვეყნა და "პლანეტის ყველაზე ლამაზი ქალის" ტიტული ოქროს კვეთის მიხედვით 23 წლის მოდელს, ბელა ჰადიდს ერგო.