აშშ-ს ახალი ელჩი, კელი დეგნანი საქართველოს კათალიკოს-პატრიარქს, ილია მეორეს შეხვდა. შეხვედრა 3 თებერვალს საპატრიარქოში გაიმართა. ილია მეორემ კელი დეგნანს ელჩად დანიშვნა მიულოცა.

როგორც საპატრიარქოს პრესსამსახური ინფორმაციას ავრცელებს, შეხვედრაზე საუბარი აშშ-სა და საქართველოს შორის მეგობრულ ურთიერთობებსა და ქვეყნის წინაშე არსებულ გამოწვევებს შეეხო. ილია მეორემ ხაზი გაუსვა ოკუპირებული ტერიტორიების მშვიდობიანი გზით დაბრუნების აუცილებლობას და აშშ-ს მიერ საქართველოსთვის გაწეული თანადგომისთვის მადლობა გადაუხადა.

"პრობლემები ბევრია, მაგრამ იმედი უფრო მეტია", — აღნიშნა პატრიარქმა.

ფოტო: საქართველოს საპატრიარქო

ფოტო: საქართველოს საპატრიარქო

დეგნანის წინამორბედს, ელჩ იან კელის უფლებამოსილების ვადა 2018 წლის მარტში ამოეწურა, მას შემდეგ, წელიწადზე მეტი აშშ-ს საქართველოში ელჩი არ ჰყავდა და მოვალეობას ელიზაბეთ რუდი ასრულებდა. დეგნანის კანდიდატურა ამერიკის პრეზიდენტმა, დონალდ ტრამპმა კონგრესს 2019 წლის სექტემბერში წარუდგინა. დეკემბერში კი სენატმა ის ელჩად დანიშნა, იანვარში კი მან ელჩის ფიცი დადო.

კელი დეგნანი ევროპასა და აფრიკაში აშშ-ს სამხედრო საზღვაო ძალების სარდლის პოლიტიკური მრჩეველი იყო. მანამდე ის კოსოვოსა და იტალიაში აშშ-ს დიპლომატიური მისიის ხელმძღვანელის მოადგილედ მუშაობდა. ასევე, ნატოში აშშ-ს წარმომადგელობაში იყო პოლიტიკური მრჩეველი და თურქეთში აშშ-ს საელჩოში პოლიტიკური მრჩეველის მოადგილე.

გაიგეთ მეტი: