ბოლო ინფორმაციით, ბაღდათში ხანძრის შედეგად დაღუპულთა რიცხვი 6-მდე გაიზარდა. საგანგებო სიტუაციების სამსახურის ცნობით, ნაპოვნია კიდევ ერთი — ხანშიშესული ქალის ცხედარი. ასევე, დაღუპულია დედა და ოთხი ბავშვი. გავრცელებული ინფორმაციით, ქალი ორსულად იყო.

არსებული ინფორმაციით, ოჯახი სოციალურად დაუცველი იყო და მიტოვებულ სახლში თვითნებურად იყო შესახლებული.

ამ დროისთვის ხანძარი სრულად ლიკვიდირებულია. მომხდართან დაკავშირებით, შინაგან საქმეთა სამინისტრომ გამოძიება საქართველოს სისხლის სამართლის კოდექსის 187-ე მუხლის მე-4 ნაწილით დაიწყო, რაც ცეცხლის წაკიდებით ნივთის დაზიანებას ან განადგურებას გულისხმობს, რამაც გაუფრთხილებლობით ორი ან მეტი ადამიანის სიცოცხლის მოსპობა გამოიწვია. აღნიშნული მუხლი სასჯელის სახით 9-დან 12 წლამდე თავისუფლების აღკვეთას ითვალისწინებს.