პარლამენტის ყოფილი ვიცე-სპიკერი და დამოუკიდებელი დეპუტატი, თამარ ჩუგოშვილი ამბობს, რომ მთავრობასა და აშშ-ს შორის ურთიერთობაში პრობლემა არა კომუნიკაციასა და ლობისტებში, არამედ "არასწორ ქმედებებშია". მისი თქმით, მას შემდეგ, რაც პროპორციულ საარჩევნო სისტემაზე გადასვლა ჩავარდა, საქართველოს მიმართ განწყობები შეეცვალათ ისეთ კონგრესმენებსაც, რომლებიც ქვეყნის მიმართ დადებითა იყვნენ განწყობილი.

ჩუგოშვილის თქმით, აშშ-დან წამოსული კრიტიკა არა ლობისტების მუშაობის, არამედ იმედგაცრუების და ნდობის დაკარგვის შედეგია.

"ერთმანეთისგან უნდა გავმიჯნოთ ის განცხადებები, რომლებიც კონკრეტულად ინტერესებს შეესაბამება და ის განცხადებები, რომლებიც ბევრად უფრო მაღალი რანგიდან წამოსულია. ყველაზე ცუდი რაც მოხდა, 14 ნოემბრის შემდგომ მოვლენები როგორც განვითარდა, ეს განწყობა, რომ საქართველო არის კარგი პარტნიორი, რომელსაც მხოლოდ ვაქებთ და ვეხმარებით, შეიცვალა. კონგრესმენები, რომლებიც ამდენი წელია ხელს გვიმართავენ, იმათგან რატომ წამოვიდა ეს ყველაფერი", — განაცხადა ჩუგოშვილმა პალიტრანიუსის ეთერში.