ადამიანის უფლებათა ცენტრი გასულ წელს საქართველოში არსებულ ადამიანის უფლებრივ მდგომარეობას აჯამებს. ანგარიშში საუბარია სასამართლო სისტემაში არსებულ პრობლემაზე, ასევე, სამართალდამცავთა მხრიდან არაპროპორციული ძალის გამოყენების ფაქტებზე, მედიაგარემოზე და ლგბტ პირთა უფლებებზე.

ორგანიზაცია პრობლემებს შორის გამოყოფს უზენაესი სასამართლოს დაკომპლექტების საკითხს და წერს, რომ იუსტიციის უმაღლესმა საბჭომ ვერ შეძლო ობიექტური დამკვირვებლის დარწმუნება არჩეულ მოსამართლეთა კომპეტენტურობაში.

ანგარიშში აღნიშნულია 2019 წლის საპროტესტო აქციების დროს ნათლად გამოჩნდა სისტემური ხარვეზები. მათ შორის, 20-21 ივნისის მოვლენების დროს, პანკისის ხეობაში ჰესებთან და დედაქალაქში საარჩევნო სისტემასთან დაკავშირებით გამართულ აქციებზე. ამავე კონტექსტში ადამიანის უფლებათა ცენტრის "შემაშფოთებელს" უწოდებს სამართალდამცავთა მხრიდან არაპროპორციული ძალის გამოყენების ფაქტებსა და სამართალდამცავთა გადაცდომებზე სახელმწიფოს რეაგირების დეფიციტს.

ანგარიშში ნათქვამია ისიც, რომ 2019 წელს საქართველოში მედიაგარემო პოლარიზებული იყო:

"ისევ აქტუალურია სახელმწიფოს მხრიდან კრიტიკული მედიასაშუალებების სარედაქციო პოლიტიკის შეცვლის სხვადასხვაგვარი მცდელობები. განსაკუთრებით პრობლემური იყო ჟურნალისტური საქმიანობისთვის ხელშეშლისა და ჟურნალისტთა რეკორდული რაოდენობის ფიზიკური დაზიანება 20-21 ივნისის მოვლენებისას".

ადამიანის უფლებათა ცენტრი კვლავ გამოწვევად მიიჩნევს ადამიანის უფლებათა მდგომარეობას ოკუპირებულ ტერიტორიებზე. მათი თქმით, საოკუპაციო ხაზს მიღმა მყოფ ადამიანებს ეზღუდებათ მთელი რიგი უფლებები, "რაც კვლავაც ტოვებს ჰუმანიტარული კრიზისის რისკებს როგორც აფხაზეთის, ასევე სამხრეთ ოსეთის ოკუპირებულ ტერიტორიებზე".

ორგანიზაციის განცხადებით, ქვეყანაში კვლავ დიდი პრობლემაა სხვადასხვა უმცირესობების დისკრიმინაცია და სტიგმატიზება, განსაკუთრებით, LGBTQ+ თემის. ამასთან, აღნიშნავე, რომ რეაგირების გარეშე რჩება ულტრაკონსერვატორი ჰომოფობიური ჯგუფების ძალადობრივი ქმედებები.

ადამიანის უფლებათა ცენტრის დაკვირვებით, ქვეყანაში არ არსებობს ღირსეული შრომისთვის აუცილებელი ელემენტარული პირობები. ამასთან, გამოწვევად რჩება შრომის უსაფრთხოება, სამუშაო ადგილზე სიკვდილიანობის მაღალი მაჩვენებელი, შრომითი ექსპლუატაცია და ა.შ.

ანგარიში ეფუძნება ადამიანის უფლებათა ცენტრის, საქართველოში მოქმედი სხვა არასამთავრობო ორგანიზაციების, საქართველოს სახალხო დამცველისა და საერთაშორისო ორგანიზაციების მონაცემებს და შეფასებებს.