აშშ-ის გამოძიების ფედერალურმა ბიურომ (FBI) 8 ნოემბრის საპრეზიდენტო არჩევნებამდე რამდენიმე დღით ადრე ხელახლა დაიწყო ჰილარი კლინტონის "იმეილების საქმის" გამოძიება. ამის საფუძველი კი გახდა FBI-ის გამომძიებლების მიერ აღმოჩენილი ახალი ელექტრონული შეტყობინებები, რომელიც აშშ-ს პრეზიდენტობის კანდიდატს სახელმწიფო მდივნის პოსტზე მუშაობისას, პერსონალური სერვერიდან აქვს გაგზავნილი.

გამოძიების განახლების შესახებ FBI-ის შეფმა, ჯეიმს კომიმ კონგრესს პარასკევს, წერილობით აცნობა. კომი წერილში წერს, რომ ჰილარი კლინტონის ახალი ელექტრონული შეტყობინებები, რომელიც საგამოძიებო ორგანომ აღმოაჩინა, გამოძიებისთვის სასარგებლოა. შესაბამისად, უწყება გააგრძელებს ძიებას, ახლადაღმოჩენილ წერილებში, რომელიც კლინტონის თანამდებობაზე ყოფნის დროს პერსონალური სერვერიდან იგზავნებოდა, არის თუ არა სახელმწიფო საიდუმლოების შემცველი ინფორმაცია.

"მიუხედავად ამისა, FBI-ის ჯერჯერობით არ შეუძლია შეაფასოს, ეს მასალები არის თუ არა მნიშვნელოვანი და ასევე არ შემიძლია წინასწარ თქმა, რა დრო დასჭირდება ამის გაკეთებას", - წერს FBI-ის შეფი კონგრესისთვის გაგზავნილ წერილში და იქვე მიუთითებს, რომ მისთვის მნიშვნელოვანია, კონგრესი ინფორმირებული იყოს მიმდინარე მოვლენებზე.

ჰილარი კლინტონის იმეილების საქმის გამოძიება ჯერ კიდევ მაშინ დაიწყო, როცა კლინტონს თავისი საპრეზიდენტო სურვილების შესახებ გაცხადებული არ ჰქონდა. FBI იძიებდა, ხომ არ იყო კანონდარღვევა კლინტონის ქმედება მაშინ, როცა ის სახელმწიფო მდივნის პოსტზე მუშაობისას, ელექტრონული მიმოწერისთვის იყენებდა არა სახელმწიფო სერვერებს, არამედ კერძოს. რამდენიმე თვის წინ FBI-მ საქმის გამოძიება შეაჩერა, რადგან მათი შეფასებით, ეს „დაუდევრობა“ უფრო იყო, ვიდრე დანაშაული. თუმცა, კლინტონი აღნიშნული ქმედების გამო კრიტიკის ქარცეცხლში მაინც გაეხვა, რადგან კერძო სერვერები ჰაკერების სამიზნე უფრო ადვილად შეიძლება გახდეს, ვიდრე სახელმწიფო.

FBI-ის მიერ გამოძიების განახლების შესახებ გავრცელებულ განცხადებას, ჯერჯერობით მხოლოდ კლინტონის კონკურენტი, დონალდ ტრამპი გამოეხმაურა. მან ჰილარი კლინტონის დასჯა მოითხოვა. თავად ჰილარი კლინტონს კი ჯერ საპასუხო განმარტება არ გაუვრცელებია.