ე.წ. ისლამური სახელმწიფოს მებრძოლებმა ერაყის ქალაქ მოსულთან 232 ადამიანი მოკლეს და ათიათასობით მოსახლე ცოცხალ ფარად გამოიყენეს. ინფორმაციას გაეროზე დაყრდნობით CNN ავრცელებს.

ტერორისტების ჯგუფმა მასშტაბური მკვლელობები ოთხშაბათს დაიწყეს. მათ დასაჯეს ის ადამიანები, რომლებიც მათ ბრძანებებს არ დაემორჩილნენ.

"ოთხშაბათს მათ 42 ადგილობრივი მოკლეს მოსულის სამხრეთით. იმავე დღეს სიკვდილით დასაჯეს 190 ყოფილი ჯარისკაცი, რომლებიც ერაყის არმიაში მსახურობდნენ და ტერორისტებთან გარიგებაზე უარი განაცხადეს" - ამბობს UN-ს ადამიანის უფლებათა დამცველი CNN-თან საუბარში.

17 ოქტომბრიდან ISIS-ის მებრძოლებმა ათიათასობით კაცი, ქალი და ბავშვი მოსულის განაპირა ქალაქებიდან წაიყვანეს, რათა მოსულის შესანარჩუნებლად ისინი ცოცხალ ფარად გამოეყენებინათ.

ბრძოლა მოსულის გასათავისუფლებლად

ერაყის მთავრობამ მოსულის ე.წ. ისლამური სახელმწიფოსგან გასათავისუფლებლად მასშტაბური ოპერაცია 17 ოქტომბერს დაიწყო.

ერაყის არმია მოსულისკენ სამხრეთიდან მიემართება, მისი მოკავშირე ქურთები კი აღმოსავლეთიდან დაიკავებენ ქალაქს. როგორც ქურთების მეთაურმა CNN-ს განუცხადა, ქალაქის გათავისუფლებას 2 თვე დასჭირდება, მანამდე კი არმიას 2 კვირა სჭირდება ქალაქში შესასვლელად.

ამის პარალელურად, მოსახლეობა ქალაქის დატოვებას ცდილობს. მოსულში მოსახლეობა მილიონნახევარზე მეტია. მათ შორის არის ISIS-ის 5 000-ზე მეტი მებრძოლი.

ერაყის არმიამ დღეს განაცხადა, რომ ქალაქის სამხრეთი ნაწილის დაკავებისას მათ მნიშვნელოვან პროგრესს მიაღწიეს.

როგორ იბრძვის ISIS მოსულის შესანარჩუნებლად

ე.წ. ისლამური სახელმწიფო ასიმეტრიულ საომარ ტაქტიკებს იყენებს, რათა ოპონენტებს ზიანი მიაყენოს და დაატეროროს ისედაც დატანჯული მოსახლეობა.

როდესაც ISIS-მა გოგირდის ქარხნის ტერიტორიიდან უკან დაიხია, მათ გოგირდის მასიურ მთაზე ასაფეთქებელი მოწყობილებები მოათავსეს, რამაც ტოქსიკური, მომწამლავი ბოლის გაშვება გამოიწვია.

ISIS-მა ცეცხლი წაუკიდა ნავთობით მდიდარ რეგიონებსაც. დაჯგუფების მიზანი კოალიციის საჰაერო ძალების ხილვადობის შესუსტება იყო. ცეცხლი დღეების განმავლობაში ენთო, რამაც ათასობით ადამიანის სამედიცინო დახმარების საჭიროება და სამხედრო ოპერაციების შეფერხება გამოიწვია

გაიგეთ მეტი.