BBC გაეროს მიგრანტთა სააგენტოზე დაყრდნობით იუწყება, რომ 900-მდე ადამიანმა ერაყის ქალაქი მოსული დატოვა და სირიის საზღვარი გადაკვეთა.

ესაა მოსახლეობის პირველი დიდი ჯგუფი, რომელმაც ადგილი დატოვა, მას შემდეგ, რაც ერაყის მთავრობამ მოსულის ე.წ. ისლამური სახელმწიფოსგან გასათავისუფლებლად მასშტაბური ოპერაცია დაიწყო.

მოსულში მოსახლეობა მილიონნახევარზე მეტია. მათ შორის არიან ISIS-ის 5 000-ზე მეტი მებრძოლი.

არსებოს შიში, რომ ტერორისტები მშვიდობიან მოსახლეობას ფარად გამოიყენებენ, როდესაც ერაყის არმია მოსულს მიუახლოვდება.

გაეროს წარმომადგენლის ცნობით, სირიაში გადასული მოსახლეობა მიგრანტთა ბანაკებში იმყოფებიან, მათ ერაყის შედარებით მშვიდობიან ნაწილში დააბრუნებენ. მისი თქმით, ISIS-ის მებრძოლები ვერ ახერხებენ, რომ ქალაქის დატოვებისგან ყველა შეჩერონ.

ერაყის მთავრობა მოსულის მოსახლეობას სახლში დარჩენისკენ მოუწოდებს, რადგან ე.წ. ისლამური სახელმწიფოს მებრძოლებს შესაძლოა გზებზე ნაღმები ჰქონდეს დატოვებული.

ბარაკ ობამა კი მიიჩნევს, რომ მნიშვნელოვანია უსაფრთხოების მიზნით მოსახლეობამ ქალაქი დატოვოს.

გაერო აცხადებს, რომ ქალაქის ჩრდილოეთით, აღმოსავლეთით და სამხრეთით მნიშვნელოვანია ბანაკების განლაგება, რადგან მათი ვარაუდით, შეტაკების პირველ რამდენიმე კვირაში მოსულს 200 000-მდე მოსახლე დატოვებს, თუმცა მათი უმრავლესობა დასავლეთით მიდის და სირიაში გადადის.

ერაყის არმია მოსულისკენ სამხრეთიდან მიემართება, მისი მოკავშირე ქურთები კი აღმოსავლეთიდან დაიკავებენ ქალაქს. როგორც ქურთების მეთაურმა CNN-ს განუცხადა, ქალაქის გათავისუფლებას 2 თვე დასჭირდება, მანამდე კი არმიას 2 კვირა სჭირდება ქალაქში შესასვლელად.

ქალაქიდან 30-40 კილომეტრის სიახლოვეს არსებული 10 სოფელი უკვე გათავისუფლებულია.