ერაყის არმია და პოლიცია დღეს იწყებენ მასშტაბურ სამხედრო ოპერაციას ქვეყნის სიდიდით მეორე ქალაქის, მოსულის გასათავისუფლებლად, რომელიც ტერორისტულმა ორგანიზაციამ, ისლამურმა სახელმწიფომ დაიკავა 2014 წლის ივნისში.

როგორც CNN წერს, ეს იქნება მნიშვნელოვანი ნაბიჯი ერაყის მთავრობის მხრიდან, რომელიც შეარყევს ტერორისტული ორგანიზაციის პოზიციებს ქვეყნის ჩრდილოეთით, რომელიც ცნობილია ნავთობის მდიდარი მარაგებით. თუ აღნიშნული სამხედრო ოპერაცია წარმატებული აღმოჩნდა, ე.წ. ისლამური სახელმწიფოს ტერორისტები განდევნილი იქნებიან ერაყის ყველა დიდი ქალაქიდან.

ერაყის მთავრობის განცხადებაში ნათქვამია, რომ ისინი ყველაფერს გააკეთებენ, რათა ტერორისტების ტყვეობაში აღმოჩენილი 1,5 მილიონი ადამიანი იხსნან მათგან და მათთან ერთად იზეიმონ გამარჯვება.

მოსულის მიმდებარე დასახლებებზე სამხედრო შეტევა უკვე დაიწყო ქურთულმა არმიამ, პეშმეგრამ, რომელმაც სახელი სწორედ ე.წ. ისლამური სახელმწიფოს ტერორისტებთან ბრძოლითა და მათი დამარცხებით გაითქვა.

ერაყის არმიამ ტერორისტებისგან 2015 წელს სამი ქალაქი – ტიკრიტი და რამადი გაათავისუფლა, ხოლო 2016 წლის ივნისში – ფალუჯა. აღნიშნული სამხედრო ოპერაციების შემდეგ ტერორისტული ორგანიზაციის საყრდენი ერაყის ტერიტორიაზე მნიშვნელოვნად შესუსტდა.