ადამიანის უფლებებზე მომუშავე არასამთავრობო ორგანიზაციები მოითხოვენ, რომ 2 იანვარს 24 წლის კაცის მოკვლის საქმე პროკურატურის ნაცვლად სახელმწიფო ინსპექტორის აპარატმა შეისწავლოს. მათ მიაჩნიათ, რომ ეს სწორედ ამ უწყების კომპეტენციას განეკუთვნება, რადგან საქმეში ბრალდებული სამართალდამცავია.

არასამთავრობო ორგანიზაციები ამ მოთხოვნას სახელმწიფო ინსპექტორის შესახებ კანონის რამდენიმე მუხლით ასაბუთებენ:

• მუხლი 19, პუნქტი "ა" — სახელმწიფო ინსპექტორის გამოსაძიებელ საქმეთა კატეგორიას განეკუთვნება სამართალდამცავი ორგანოს წარმომადგენლის მიერ წამების, წამების მუქარისა და დამამცირებელი ან არაადამიანური მოპყრობის საქმეების გამოძიება;
• მუხლი 19, პუნქტი "ბ" — სახელმწიფო ინსპექტორის გამოსაძიებელ საქმეთა კატეგორიას ასევე განეკუთვნება სამართალდამცავი ორგანოს წარმომადგენლის მიერ ჩადენილი ის დანაშაული, რომელმაც გამოიწვია პირის სიცოცხლის მოსპობა და რომლის ჩადენის დროს მას სამართალდამცავი ორგანოს წარმომადგენლის მიერ, თავისი ნების საწინააღმდეგოდ აკრძალული ჰქონდა ადგილსამყოფლის დატოვება.

არასამთავრობო ორგანიზაციების განმარტებით, კანონის აღნიშნული ჩანაწერი ნებისმიერ იმ შემთხვევას გულისხმობს, როდესაც სამართალდამცავი ორგანოს წარმომადგენელმა სამოქალაქო პირს აღუკვეთა თავისუფლება და არ მისცა თავისფლად გადაადგილების შესაძლებლობა.

"კანონის აღნიშნული ჩანაწერის მიზანი და ზოგადად, სახელმწიფო ინსპექტორის სამსახურის შექმნის მთავარი იდეა, სწორედ სამართალდამცავთა მიერ ჩადენილი დანაშაულების ეფექტიანი და დროული გამოძიებაა. წლების განმავლობაში ადგილობრივი ორგანიზაციების და საერთაშორისო პარტნიორების ერთ-ერთი მთავარი მოთხოვნა სწორედ ის იყო, რომ მსგავსი დანაშაულები გამოეძიებინა დამოუკიდებელ და პოლიტიკურად ნეიტრალურ საგამოძიებო უწყებას", — აღნიშნავენ არასამთავრობო ორგანიზაციები ერთობლივ განცხადებაში.

განცხადებას ხელს აწერენ:

• საქართველოს დემოკრატიული ინიციატივა (GDI);
• ადამიანის უფლებათა სწავლებისა და მონიტორინგის ცენტრი (EMC);
• ადამიანის უფლებათა ცენტრი (HRC);
• საერთაშორისო გამჭვირვალობა — საქართველო (TI);
• სამართლიანი არჩევნებისა და დემოკრატიის საერთაშორისო საზოგადოება (ISFED);
• საქართველოს ახალგაზრდა იურისტთა ასოციაცია (საია);
• საქართველოს ღია საზოგადოების ფონდი (OSGF);
• ინფორმაციის თავისუფლების განვითარების ინსტიტუტი (IDFI).

24 წლის ბიჭის მკვლელობის საქმე

2 იანვარს 24 წლის ბიჭი ე.წ. დამპალოს სასაფლაოზე მოკლეს. ოჯახის წევრები ამბობდნენ, რომ შსს-ს მოქმედმა თანამშრომლებმა მამაკაცს სცემეს, ბლაგვი საგნით დაზიანებები მიაყენეს, წამების შემდეგ კი გააშიშვლეს და სასაფლაოდან რამდენიმე კილომეტრში ღია ცის ქვეშ დატოვეს. მომაკვდავი ახალგაზრდა ოჯახმა მომხდარიდან მეორე დღეს იპოვა.

ინფორმაციის მედიაში მოხვედრის შემდეგ ცნობილი გახდა, რომ შინაგან საქმეთა სამინისტრომ უწყების თანამშრომელი დააკავა. ოჯახი ამტკიცებდა, რომ საქმეში მონაწილეობდა მეორე პირიც, რომელიც მოგვიანებით დააკავეს.

საქმეზე გამოძიება სისხლის სამართლის კოდექსის სამი მუხლით დაიწყო. კერძოდ, 126¹-ე მუხლის "გ" ქვეპუნქტით, 117-ე მუხლის მე-6 ნაწილითა და 143-ე მუხლის პირველი ნაწილით. ამ მუხლებით ორი ან მეტი პირის მიმართ ცემის და ძალადობის, ჯანმრთელობის განზრახ მძიმე დაზიანებით სიცოცხლის მოსპობისა და ადამიანის მოტაცებისთვის პატიმრობაა გათვალისწინებული.