სომეხმა სამართალდამცავებმა ტერორისტული თავდასხმის მომზადებისა და ძალაუფლების ხელში ჩაგდების საქმეზე "სომხური ღირებულებების დაცვის საზოგადოების" თავმჯდომარესა და აქტივისტს, ვაჰაგნ ჩახალიანს ორთვიანი პატიმრობა მიუსაჯეს. მისი დაპატიმრების შესახებ ცნობები მთავარეპისკოპოსების, ბაგრატ გალსტანიანისა და მიქაელ აჯაფახიანის დაკავებების ფონზე გავრცელდა. დეტალებზე კავკაზსკი უზელი წერს.

ვაჰაგნ ჩახალიანის დაკავებას სოციალურ ქსელში საქართველოს მე-3 პრეზიდენტი მიხეილ სააკაშვილი გამოეხმაურა. მისი თქმით, ჩახალიანი "გრუს დავერბოვკებული აგენტი იყო".

"ჩახალიანი სომხურ საქმეს არ აკეთებდა არც საქართველოში და არც სომხეთში. ის იყო გრუს დავერბოვკებული აგენტი ახალქალაქის ბაზაზე. ოცნებამაც რუსული საქმე გააკეთა მისი ციხიდან გამოშვებით",— წერს სააკაშვილი.

შეგახსენებთ, რომ ვაჰაგნ ჩახალიანი ნაციონალური მოძრაობის დროს საქართველოში დააპატიმრეს. როგორც რადიო თავისუფლება წერს, მან 2013 წელს საპატიმრო ამნისტიის კანონის მიღების შედეგ დატოვა.

"კავკაზსკი უზელის" ცნობით, 25 ივნისს, უსაფრთხოების ძალებმა სომხეთში ხელისუფლების ხელში ჩაგდებისთვის მზადების საქმესთან დაკავშირებით 90-ზე მეტი ჩხრეკა ჩაატარეს. სასამართლოს გადაწყვეტილებით, "წმინდა ბრძოლის" მოძრაობის ლიდერი, მთავარეპისკოპოსი ბაგრატ გალსტანიანი და კიდევ 14 პირი წინასწარი პატიმრობაში იმყოფებიან.

ერთი დღით ადრე, 24 ივნისს, სომხეთის პრემიერმინისტრმა, ნიკოლ ფაშინიანმა განაცხადა, რომ გადატრიალება აღკვეთილი იქნა და გამოაქვეყნა დოკუმენტი, რომელიც შეიცავდა ოპოზიციის სავარაუდო გეგმის ტექსტს მისი ხელისუფლებიდან ჩამოშორების შესახებ.

27 ივნისს, უსაფრთხოების ძალებმა დააკავეს შირაკის ეპარქიის წინამძღვარი, მიქაელ აჯაპახიანი, რომელიც ნებაყოფლობით გამოცხადდა საგამოძიებო კომიტეტში. მას ბრალი ძალაუფლების ხელში ჩაგდებისკენ მოწოდებაში წაუყენეს, რის შემდეგაც ეპისკოპოსი დააკავეს.

როგორც სომხური მედია წერს, აქტივისტი ვაჰაგნ ჩახალიანი ორი თვით დაკავებულია, ამის შესახებ მისმა შვილმა სოციალურ ქსელებში განაცხადა

"ტერორისტული აქტის მომზადებისა და "წმინდა ბრძოლის" სახელწოდების მოძრაობის ლიდერებისა და მონაწილეების მიერ ძალაუფლების ხელში ჩაგდების ფაქტზე დაწყებული სისხლის სამართლის საქმის ფარგლებში, გამომძიებლის მოთხოვნით და პროკურორის გადაწყვეტილების საფუძველზე, ვ. ჩ.-ს წინააღმდეგ სისხლისსამართლებრივი დევნა დაიწყო სომხეთის რესპუბლიკის სისხლის სამართლის კოდექსის 43-419-ე მუხლის პირველი ნაწილით და 43-308-ე მუხლის პირველი ნაწილით", — იტყობინება Aysor.Am სომხეთის საგამოძიებო კომიტეტის 4 ივლისის განცხადებაზე დაყრდნობით.

შეგახსენებთ, რომ ვაჰაგნ ჩახალიანი 2021 წლის 28 იანვარს დააკავეს პრემიერმინისტრ ნიკოლ ფაშინიანის გადადგომის მოთხოვნით გამართული საპროტესტო აქციის დროს, რომლის მონაწილეებმაც სომხეთის მთავრობის შენობის წინ პოლიციის კორდონის გარღვევა სცადეს. სასამართლომ მის დაკავებაზე უარი თქვა.

2024 წელს ბაგრატ გალსტანიანმა სათავეში ჩაუდგა მოძრაობას "ტავუში სამშობლოსთვის" (მოგვიანებით ეწოდა "წმინდა ბრძოლა"), რომელიც აპროტესტებდა სასაზღვრო ტერიტორიების აზერბაიჯანისთვის გადაცემას. იმავე წლის მაისში, მთავარეპისკოპოსმა მიქაელ აჯაპახიანმა მონაწილეობა მიიღო შირაკის რეგიონის მაცხოვრებლების საპროტესტო მსვლელობაში, რომლებიც მოითხოვდნენ საზღვრის დელიმიტაციის შეჩერებას.

სომხეთის ხელისუფლებასა და სომხურ სამოციქულო ეკლესიას შორის დაპირისპირება 2020 წელს გამწვავდა 44-დღიანი ყარაბაღის ომისა და ხელისუფლების თურქეთთან ურთიერთობების გაუმჯობესების სურვილის ფონზე. სიტუაცია 2025 წლის მაისის ბოლოს დაიძაბა, როდესაც ფაშინიანმა საჯაროდ გააკრიტიკა სომხური სამოციქულო ეკლესია და მისი წარმომადგენლები და მოუწოდა ყოველთა სომეხთა ახალი კათოლიკოსის არჩევისკენ.