გაფრთხილება: სტატია შეიცავს სპოილერებს უცნაური ამბების მესამე სეზონიდან.

დაბრუნდება თუ არა ჯიმ ჰოპერი უცნაური ამბების მეოთხე სეზონში?

მიუხედავად იმისა, რომ მესამე სეზონის ბოლოს ჰოპერი მოკლეს, სერიალის ბოლო სცენაში ჩანს, როგორ ჰყავთ რუსებს ტყვედ აყვანილი უცნობი ამერიკელი. ფანების აზრით, ეს შეიძლება ყველასთვის საყვარელი შერიფი იყოს, რომლის სხეულიც, სიმართლე ვთქვათ, ეკრანზე არ გვინახავს.

Murphy’s Multiverse-ის ექსკლუზიური ინფორმაციით, მეოთხე სეზონის გადაღება იანვრის ბოლოს, ან თებერვლის დასაწყისისთვის იგეგმება, თუმცა, წინა სეზონებისგან განსხვავებით, ახლა სეზონის ნაწილს ლიეტუვის ციხეში გადაიღებენ და მხოლოდ ამის შემდეგ დავბრუნდებით ატლანტაში. ახალ სეზონში ასევე გამოყენებული იქნება, HBO-ს მინი-სერიალის, ჩერნობილის ლოკაციები.

თუ "უცნობი ამერიკელი" ნამდვილად ჯიმ ჰოპერია, მაშინ შესაძლოა, მისთვის სულაც არ მოგვიკრავს ბოლოჯერ თვალი.

ფოტო: Netflix

დევიდ ჰარბორმა (ჯიმ ჰოპერმა) ამ თემაზე ჯერ კიდევ ოქტომბერში ისაუბრა სეტ მაიერის შოუში.

"ვიცოდი, რომ ჰოპერს თავი უნდა გაეწირა. ხანდახან ძალიან უსიამოვნო ადამიანია და, შესაბამისად, ეს რამით უნდა დაბალანსებულიყო. შესაბამისად, თავგანწირვა მისთვის შესაფერისი დასასრული იქნებოდა", - აღიარა დევიდმა.

ჰარბორმა ისიც თქვა, რომ როცა ციხის მინი-სცენა ნახა, ჩათვალა, რომ მისი პერსონაჟი გადარჩა, თუმცა ამის შემდეგ სერიალიდან მას აღარავინ შეხმიანებია.

იმის დასამტკიცებლად, რომ მსახიობმა თვითონაც არ იცის გმირის ბედი, ჰარბორმა Facetime-ით სერიალის პროდიუსერებს, ძმებ დიუფერებს დაურეკა.

"მე მკვდარი ვარ თუ არა?", - იკითხა მსახიობმა.

"ჯერაც ვფიქრობთ", - იყო როსის პასუხი.

"ძალიან მეხმარებით, ძალიან. მაგრად მუშაობთ. წარმატებას გისურვებთ მეოთხე სეზონში", - უთხრა დევიდმა სერიალის შემქმნელებს.

მეოთხე სეზონის პრემიერის თარიღი ჯერ არ არის ცნობილი, ასე რომ, ისიც არ ვიცით, როდის გავიგებთ ჰოპერის ბედს.