რამდენიმე საათის წინ ლოს-ანჯელესში გამართულ ოქროს გლობუსის რიგით 77-ე დაჯილდოებაზე ცნობილ ტელეწამყვანს, ელენ დეჯენერსს კეროლ ბარნეტის სახელობის საპატიო ჯილდო გადასცეს.

ეს ჯილდო თავდაპირველად 2019 წელს გაიცა და პირველად ის სწორედ თავად ცნობილ მსახიობს, კომიკოსსა და პროდიუსერს, კეროლ ბარნეტს გადაეცა. ელენ დეჯენერესი მეორე ადამიანია, ვინც ეს ჯილდო მიიღო.

პრიზის აღებისას ტელეწამყვანმა განაცხადა:

"ტელევიზიამ შთამაგონა ყველაფერი ის, რასაც დღეს წარმოვადგენ. მხოლოდ ის მინდა, რომ ადამიანების გაცინება შევძლო და დავეხმარო თავი უკეთ იგრძნონ, რადგან იმაზე უკეთესი გრძნობა არაფერი, როცა გეუბნებიან, რომ რთული დროის გადატანაში დაეხმარე".

გავლენიანი ტელეწამყვანისათვის საპატიო ჯილდოს გადაცემასთან დაკავშირებით უცხოური პრესის ასოციაციის პრეზიდენტმა, ლორენცო სორიამ მასზე ისაუბრა:

"სატელევიზიო წარმატებასთან ერთად, ის არის ფილანტროპი და სხვათა უფლებების დამცველი, რომელიც იმ ადამიანთა ხმებს აჟღერებს, ვისიც მანამდე არ გვესმოდა და თავის პლატფორმის საშუალებით მუდამ სიკეთესა და სიხარულს ავრცელებს".

ელენ დეჯენერესმა კარიერა 90-იან წლებში დაიწყო და ცნობილი ABC-ის სერიალ Ellen-ში შესრულებული როლით გახდა. ის საყოველთაო ყურადღების ქვეშ მაშინ მოექცა, როცა 1997 წელს ერთ-ერთ სერიაში მისმა პერსონაჟმა გააცნობიერა, რომ ლესბოსელია და საჯარო ქამინგ აუთი გააკეთა.

დეჯენერესი ერთ-ერთი ყველაზე ცნობილი პიროვნებაა, რომლის საავტორო გადაცემა The Ellen DeGeneres Show უკვე 17 სეზონია გადის. გადაცემა სხვადასხვა დროს Daytime Emmy-ის გამარჯვებული 11-ჯერ გახდა.