"საგადასახადო სისტემა ადრეც შეცვლილა და ახლაც უნდა შეიცვალოს კიდევ უფრო უნდა გავზარდოთ გადასახადები ისეთი ადამიანებისთვის, როგორიც მე ვარ", - აცხადებს ბილ გეიტსი, ჯეფ ბეზოსის შემდეგ მსოფლიოს უმდიდრესი ადამიანი.

მაიკროსოფტის დამფუძნებელმა მილიარდერმა საკუთარი შეხედულებები წინასაახალწლო ბლოგპოსტში ჩამოაყალიბა. მისი თქმით, ნაცვლად შემოსავლებისა, გადასახადები ინვესტიციების მიხედვით უნდა დაითვალოს, რაც კანონში თავის დასაძვრენ ნაწილებს აღარ დატოვებს.

"ზედმეტად "მაჯილდოებენ" ჩემ მიერ გაწეული შრომისათვის. მდიდრებმა ბევრად მეტი უნდა გადაიხადონ, შემდეგ კი ეს გადასახადები ჭკვიანურად გადანაწილდეს, რათა უფრო ჯანსაღი და სამართლიანი სამყარო შევქმნათ", - ნათქვამია წერილში.

გეიტსის არგუმენტები მდიდრებისთვის გადასახადების ზრდასთან დაკავშირებით

  • აშშ-ის ხელისუფლებას მეტი თანხა სჭირდება, რომ საკუთარი ვალდებულებები შეასრულოს ხალხის წინაშე;
  • გადასახადების სისტემის ცვლილება შეამცირებს მდიდრებსა და ღარიბებს შორის სხვაობის, რომელიც ბოლო 50 წლის განმავლობაში საგრძნობლად გაზრდილია;
  • მთავრობა გადასახადებს უმეტესად შემოსავლებზე და ხელფასებზე აწესებს. აკრეფილი გადასახადების 75% სწორედ ამაზე მოდის, მაშინ როცა მდიდარი ადამიანების შემოსავლების დიდი ნაწილი ინვესტიციებზეა დამოკიდებული.

"ჩემი აზრით, ცხადია, რომ სისტემა უსამართლოა", - წერს გეიტსი, - "ვერ ვხვდები, რატომ უნდა დავაფასოთ არსებული ქონება შრომაზე მეტად".

გეიტსის ქონება $113 მილიარდს აღწევს. გადასახადების სახით მას დღემდე 10 მილიარდი აქვს გადახდილი.