არჩევნების შემდგომი პერიოდის ანალიზმა აჩვენა, რომ საზოგადოებრივმა მაუწყებელმა ეგზიტპოლების გაშუქებით მაყურებლის მოზიდვა ვერ შეძლო.

საერთაშორისო გამჭვირვალობის ინფორმაციით, 8 ოქტომბერს, არჩევნების დღეს, 20:00-ზე, ეგზითპოლების გამოცხადებისას, საზოგადოებრივი მაუწყებლის რეიტინგი 0,46%-ს შეადგენდა.

ამ დროს, იგივე ეგზიტპოლების მონაცემებით, რეიტინგის 10,6%-იანი მაჩვენებლით, მედიასივრცეში ტელეკომპანია იმედი პირველი 1 წუთის განმავლობაში პირველ ადგილზეა.

10 წუთიანი შეფასების სკალის მიხედვით, მომავალი 9 წუთის განმავლობაში ტელესივრცეში რუსთავი 2 ლიდერობს.

ფოტო: TNS

"საზოგადოებრივი მაუწყებელი წამყვან ტელევიზიებს რეიტინგებში კონკურენციას ვერასოდეს უწევს. შესაბამისად, გაუგებარი იყო თუ რა არგუმენტებსა და ვარაუდებზე დაყრდნობით ჰქონდა მაუწყებლის მენეჯმენტს მოლოდინი, რომ ეგზითპოლები არჩევნების დღეს არხის რეიტინგს გაზრდიდა" - აცხადებს საერთაშორისო გამჭვირვალობა.

აღსანიშნავია, რომ საზოგადოებრივმა მაუწყებელმა არ გაიზიარა არასამთავრობო ორგანიზაციების შეთავაზება, რომ მას ორივე ეგზიტპოლის მონაცემები გაეშუქებინა. სწორედ ასე მოიქცა ტელეკომპანია პირველი, რომელმაც საზოგადოებრივ მაუწყებელზე ოდნავ უფრო მაღალი რეიტინგი აჩვენა.

3 ოქტომბერს, სერგი გვარჯალაძემ ისაუბრა მიზეზებზე, რის გამოც მაუწყებელმა გადაწყვიტა საერთო ეგზიტპოლის ჩატარება. მან აღნიშნა, რომ არჩევნების დღე ტელევიზიისთვის მნიშვნელოვანი დღეა და მაუწყებელმა გამოიყენა შანსი იაფად, თანხის დაზოგვით მიეღო კვალიფიციური ციფრები და გაეკეთებინა კარგი, რეიტინგული გადაცემები.

კითხვაზე, თუ რა გარანტია აქვს მაუწყებელს, რომ მაყურებელი ამ კვლევას მათ გადაცემაში იხილავს და არა იმ ტელევიზიებში, რომელთაც უფრო მაღალი რეიტინგი აქვთ, სერგი გვარჯალაძემ უპასუხა, რომ მათი პასუხისმგებლობაა ეს თემა დაბალანსებულად, ხარისხიანად და სიღრმისეულად გააშუქონ და ამით მიიღონ გარანტია, რომ მაყურებელი ეყოლებათ:

"კვლევის მონაწილე სხვა კომერციული არხები სხვა ასპექტებზე გააკეთებენ აქცენტს. ჩვენი აქცენტი კი გაკეთდება იმაზე, რომ სიღრმისეულად მივაწოდოთ მაყურებელს ინფორმაცია".

მას შემდეგ, რაც საზოგადოებრივმა მაუწყებელმა გამოთქვა სურვილი კომერციულ ტელეკომპანიებთან ერთად კვლევა ჩაეტარებინა, არასამთავრობო ორგანიზაციებმა მოუწოდეს საზოგადოებრივი მაუწყებლის სამეურვეო საბჭოსა და მენეჯმენტს თავი შეეკავებინა ისეთი პროექტების განხორციელებისგან, რომლებიც მაუწყებლის მიუკერძოებლობას ეჭვქვეშ დააყენებდა.

TI-ს ცნობით, GPB არ აპირებს TNS-სთვის ეგზიტპოლების ჩატარების საფასურის გადახდას.