"არ მაინტერესებს", — ასე უპასუხა ექიმმა ვაჟა გაფრინდაშვილმა კითხვა, გაუგია თუ არა თბილისის დეპუტატის, ერეკლე კუხიანიძის შესახებ. ამის შესახებ მან გადაცემა მთავარ აქცენტებში ისაუბრა. როგორც გაფრინდაშვილმა თქვა, კუხიანიძის შესახებ მან გათავისუფლების შემდეგ გაიგო.

გაფრინდაშვილის უკანონო პატიმრობაში ყოფნის პერიოდში ერეკლე კუხიანიძემ ექიმის ოჯახი პროვოკაციაში დაადანაშაულა და აგინა. მსგავსი შინაარსის კრიტიკული პოსტი კუხიანიძემ პირად ფეისბუქგვერდზე მას შემდეგ გამოაქვეყნა, რაც გაფრინდაშვილის ოჯახმა ოცნების ორგანიზებულ ღონისძიებაზე თქვა, რომ ზეიმის დრო არ არის. საკრებულოსთან ერეკლე კუხიანიძის გადადგომის მოთხოვნით აქცია 16 დეკემბერსაც გაიმართა. 17 დეკემბერს მის კაბინეტში აქტივისტებმა და ოპოზიციის წევრებმა კარავი გაშალეს და ამ ფორმით მოითხოვდნენ ერეკლე კუხიანიძის წასვლას. ქართული ოცნების გადაწყვეტილებით, ერეკლე კუხიანიძე თბილისის საკრებულოს უმრავლესობიდან 18 დეკემბერს გარიცხეს.

28 დეკემბერს 48-დღიანი უკანონო პატიმრობის შემდეგ ვაჟა გაფრინდაშვილი საოკუპაციო ძალებმა გაათავისუფლეს.

ვაჟა გაფრინდაშვილი 9 ნოემბერს კასპის რაიონში დააკავეს. ის ოკუპირებულ რეგიონში პაციენტის სანახავად მიდიოდა. დე ფაქტო სასამართლომ მას 1 წლითა და 9 თვით უკანონო პატიმრობა მიუსაჯა. სასამართლომ ეს გადაწყვეტილება იმის გამო მიიღო, რომ გაფრინდაშვილი ე.წ. საზღვრის კვეთას არ აღიარებდა და აცხადებდა, რომ საქართველოს ტერიტორიაზეა.

საოკუპაციო რეჟიმს ვაჟა გაფრინდაშვილის გათავისუფლებისკენ მოუწოდა არაერთმა ქვეყანამ, მათ შორის, ლიეტუვის საგარეო საქმეთა მინისტრმა, ლინას ლინკევიჩუსმა და აშშ-ს მთავრობამ.

ამავე თემაზე: