ფინანსთა მინისტრი ივანე მაჭავარიანი ამბობს, რომ გაურკვეველია რატომ მისცეს მისმა წინამორბედებმა ტელეკომპანია რუსთავი 2-ს იმის საშუალება, რომ ამხელა ვალი დაეგროვებინა. სავარაუდო მიზეზებად ის ხათრს, კომპლექსებსა და შიშებს ასახელებს.

"როდესაც 2016 წლის ოქტომბრიდან რუსთავი 2-მა ვალის დაგროვება დაიწყო, ვერ გავარკვიე რატომ მიეცა ამის საშუალება 2017 წლის მარტამდე. თორემ მარტის მერე, რომ გაგრძელდა ვალის დაგროვება ეგ მესმის. მაშინ სტრასბურგის მოსამართლემ შეაჩერა გადაწყვეტილება და იქ იყო მინიშნება, რომ მთავრობამ თავი შეიკავოს ისეთი გადაწყვეტილებისგან, რომელიც გამოიწვევდა არხის შეფერხებას. მთავრობის წარმომადგენლებმა ეს გაითვალისწინეს, რამდენად სწორია და არასწორია ეს სხვა საკითხია, მაგრამ მესმის, რომ გაითვალისწინეს", — განუცხადა მან ჟურნალისტებს.

მინისტრის თქმით, ტელევიზიების ვალების გადანაწილების ძველი მეთოდი უსამართლო იყო, მაგრამ არ აპირებს "იგივე სიმახინჯე" გააგრძელოს.

"იმიტომ რომ ის არასწორი იყო, TV პირველმა კიდევ დააგროვოს ვალი? რუსთავმა კიდევ დააგროვოს? წაბრძანდით, 2010 წლის ჩამოწერა, 2012 წლის ჩამოწერა გამოიკვლიეთ და აგებინეთ პასუხი, საერთოდ არ მაინტერესებს", — განაცხადა მან.

მისივე თქმით, ხელისუფლების მაშინდელმა წარმომადგენლებმა ვერ გადადგეს ისეთი ქმედითი ნაბიჯები, როგორსაც მისი უწყება დგამს ახლა.

"როდესაც სტრასბურგმა მიიღო გადაწყვეტილება, მიუხედავად იმისა ვის მფლობელობაში დარჩებოდა ძველების თუ ახლების, ჩვენთვის გაიხსნა შესაძლებლობა, რომ გვეთქვა: დღეიდან ყველამ დაიწყოს გადახდა და ძველ ვალზე მობრძანდით, ვისაუბროთ", — განაცხადა მან.

25 დეკემბერს ფინანსთა სამინისტროს შემოსავლების სამსახურმა TV პირველს, კავკასიასა და რუსთავი 2-ს და ერთ-ერთ რეგიონულ მაუწყებელს ინკასო დაადო. ამით ტელევიზიებს ფინანსური ოპერაციები შეეზღუდათ.

ფინანსთა სამინისტროში არ ამხელენ, ზუსტად რომელ ტელევიზიებს დაადეს ინკასო. პრესსამსახურში აცხადებენ, რომ ეს კომერციული საიდუმლოა. ინკასოდადებული ტელევიზიების ზუსტი რაოდენობა უცნობია, თუმცა TV პირველის, კავკასიისა და რუსთავი 2-ის წარმომადგენელები ინფორმაციას ადასტურებენ.

ფინანსთა მინისტრთან დღევანდელი შეხვედრა პროტესტის ნიშნად დატოვა ტელეკომპანია პირველის დირექტორმა ინგა გრიგოლიამ. როგორც ინგა გრიგოლია ამბობს, მინისტრთან შეხვედრისას პროტესტი გაუჩინა იმან, რომ ვანო მაჭავარიანს "არ აინტერესებდა" რატომ იყვენენ მისულები ტელემაუწყებლების დირექტორები.