ნაბახუსევი ის ერთ-ერთი შემაწუხებელი კომპონენტია, რომელიც ახალ წელს სდევს. თავის ტკივილი, სიმძიმის შეგრძნება — მოკლედ ნამდვილი ტანჯვაა. საბედნიეროდ, ქართველებს იმაში მაინც გაგვიმართლა, რომ ბორჯომი გვაქვს. თუმცა, დანარჩენ მსოფლიოს ნაბახუსევის გადასატანად სხვა საშუალების მოძებნა უწევს.

მაგალითად, ზაგრებში მცხოვრებმა ერთმა სტუდენტმა ნაბახუსევის მუზეუმი გახსნა და როგორც კარგი ისტორიების დიდი უმრავლესობა, ესეც მეგობრებთნ ერთად დალევით დაიწყო.

ერთ საღამოს, ხორვატიელი უნივერსიტეტის სტუდენტი, რინო დუბოკოვიჩი, მეგობრებთან ერთად დასალევად იყო წასული, სადაც მეგობრებმა ნაბახუსევის დროს გადამხდარი სასაცილო ისტორიები გაიხსენეს. სწორედ ამ დროს მოუვიდა რინოს იდეა, რომ სიმთვრალეში მოპოვებული ნივთები სპეციალურ მუზეუმში გამოეფინა და მათი შეგროვების ისტორია მოეყოლა.

ექვსი თვის შემდეგ, ზუსტად იმ შენობაში სადაც სტუდენტები დათვრნენ, ნაბახუსევის მუზეუმი გაიხსნა. გამოფენაზე ის ნივთებია შეგროვებული, რასაც გიჟური ღამის შემდეგ ოთახში პოულობენ ხოლმე. მათ შორისაა სათვალე, რომელიც ვიზიტორებს საშუალებას აძლევს, სამყარო ისე დაინახოს, როგორც მთვრალი ადამიანი ხედავს. იქვეა სალაპარაკო სივრცე, სადაც დაინტერესებულ პირებს შეუძლიათ თავიანთი ყველაზე ცუდი სიმთვრალის ისტორიები ერთმანეთს გაუზიარონ.

ახლად გახსნილი მუზეუმის მიზანია, რომ დამთვალიერებლებს ალკოჰოლის როგორც კარგი, ასევე ცუდი მხარე დაანახოს

ფოტო: BBC

დაფა, სადაც დამთვალიერებლები საკუთარ ანეკდოტებს ამატებენ

ფოტო: BBC

დამთვალიერებლებს ხშირად ნაპოვნ ნივთებზე ძალიან ეცინებათ

ფოტო: BBC

გამოფენის ერთ-ერთი ნივთი ველოსიპედის პედალია, რომელიც დუბოკოვიჩის მეგობარმა დილით ჯიბეში იპოვა

ფოტო: BBC

დამთვალიერებლები ნაბახუსევის სათვალით

ფოტო: BBC

მუზეუმი პირველ დეკემბერს გაიხსნა და დუბოკოვიჩის თქმით ჯერ სატესტო რეჟიმშია. ხორვატიელებისთვის ეს პირველი არაორდინალური მუზეუმი ნამდვილად არ არის. მაგალითად, 2010 წელს გულგატეხილი წყვილებისთვის მუზეუმი გახსნეს, სადაც ყოფილი პარტნიორის ნაჩუქარი ნივთებია თავმოყრილი. ასე რომ, თუ ზაგრებში მოგზაურობას გადაწყვეტ, შეგიძლია ყოფილი შეყვარებულის ერთი-ორი ნივთი საიდუმლოდ გააყოლო.

დაიღალეთ იმის გამოცნობით, თუ როდისაა ბილეთები ყველაზე იაფი? იაფი ავიაბილეთების მარტივად აღმოსაჩენად, შეგიძლიათ ავიაბილეთების კალენდარი გამოიყენოთ. კალენდარი ყველა ხელმისაწვდომ ვარიანტს გიჩვენებთ შერჩეული პერიოდისთვის და რაც უფრო მეტ თვეს აირჩევთ, მით უფრო მეტი შანსია, ბილეთებს შესაშურად იაფად გამოჰკრათ ხელი.